♻️ Ногоон ирээдүйд нэг алхам

Өглөөний мэнд! 😁 Энэ долоо хоногт хүүхэд багачуудын боловсролд хөрөнгө оруулсан олон үйл явдал тохиолоо. Түүнчлэн цаг үеийн мэдүүштэй, сонирхууштай мэдээллүүдийг нэгтгэн та бүхэнд хүргэж байна. Өдрийг сайхан өнгөрүүлээрэй 😇

МАК компани Дундговь, Дорноговь, Өмнөговь аймгийн нутгийг дамнан орших “Төхөм-X” урд талбайд газрын тосны хайгуул, судалгааны ажлыг 100% өөрийн хөрөнгөөр үе шаттай гүйцэтгэж байна 🙌

Хэрэв хайгуулын ажил үр дүнтэй байж чадвал Монгол Улсын Засгийн газартай байгуулсан бүтээгдэхүүн хуваах гэрээний дагуу Дорноговь аймгийн Алтанширээ суманд шинээр байгуулагдаж буй Газрын тос боловсруулах үйлдвэрт түүхий эд нийлүүлэх боломж бүрдэх юм 👍

🤝 “МАК Цемент” ХХК Дэлгэрхангай сумын ЗДТГ-тай хамтран “Хүүхдийн анхдугаар чуулган” зохион байгуулж байна

“МАК Цемент” ХХК нийгмийн хариуцлагын хүрээнд 11-р сарын 7-8-ны өдрүүдэд Дундговь аймгийн Дэлгэрхангай сумын ЗДТГ-тай хамтран “Хүүхдийн анхдугаар чуулган”-ыг зохион байгуулж байна. Чуулганаар дамжуулан сурагчдад хүүхдийн эрх, үе тэнгийнхний дээрэлхэлтээс урьдчилан сэргийлэх, ажил мэргэжлийн чиг баримжаа олгох, электрон тамхины хор уршгийг таниулах сургалт зохион байгуулж байгаа юм. Мөн хүүхдүүд бие биенийхээ эрхийг хүндэтгэх тухай ханын самбар бүтээн сургуулийн танхимд байршуулжээ.

Үүгээр ч зогсохгүй, эцэг эхчүүдэд "Гэр бүлийн боловсрол олгох", “Төрийн байгууллагын албан хаагчдыг чадавхжуулах сургалт”-ыг тус тус зохион байгуулж байгаа аж.

🎒 ТАНИЛЦ: “SEE Learning” хөтөлбөрт хамрагдсанаар олж авах ур чадварууд

Манай компани боловсролын салбарыг нийгмийн хариуцлагын тэргүүлэх чиглэлээр тодорхойлон ажиллаж буй. Энэ хүрээнд хүүхдүүдэд сэтгэл зүйн боловсрол олгох зорилготой “SEE Learning” хөтөлбөрийг Монгол Улсад нэвтэрсэн цагаас нь буюу 2019 оноос хойш тууштай дэмжин ажиллаж байна. АНУ-ын Эмори их сургуультай хамтарсан уг хөтөлбөрийн үр дүнд 2-18 насны хүүхдүүд дараах ур чадваруудыг эзэмших юм.

✅ Сэтгэл хөдлөлөө удирдах

✅ Өөрийгөө тайвшруулах

✅ Бусадтай харилцах

👏 TTRC ХХК-ийн хамт олон графен гарган авч “Эрдэс боловсруулалт-2024” Олон Улсын эрдэм шинжилгээ, онол практикийн бага хуралд танилцуулжээ

“Трү Ти Ар Си“ ХХК-ийн хамт олон гангаас 200 дахин бат бөх, цахилгаан дулаан дамжуулах өндөр чадвартай, одоогоор нээгдсэн дэлхийн хамгийн нимгэн (нэг нүүрстөрөгчийн атомын зузаантай) шинэ материал болох графенийг эх орондоо синтезлэн гарган авч, графенаараа супер капазитор хийн цахилгаан автомашины батерейны ашиглалтыг нэмэгдүүлэх асуудлыг шийдвэрлэх эхний алхамаа амжилттай гүйцэтгэж “Эрдэс боловсруулалт-2024” Олон Улсын эрдэм шинжилгээ, онол практикийн бага хурлын үеэр танилцуулжээ.

Балчулууны баяжуулалтаас графен - зэсийн суперкапазитор гарган авах инновацийн туршилт нь нүүрсхүчлийн хийн ялгаруулалтыг бууруулах зорилготой. Тодруулбал, графенаар баяжуулсан зэс-графенийн суперкапазитор нь цахилгаан авто тээврийн хэрэгслийн гол хөдөлгөгч болох литийн батарейн ионоос хэд дахин өндөр цэнэг хураах багтаамжтай, удаан хугацаанд цэнэгээ хадгалах давуу талтай юм байна.

📚 НСУ: Гурвантэс сумын ЕБС-д хичээлийн хэрэглэгдэхүүн, сурах бичиг хандивлав

Нарийнсухайтын уурхайн хамт олон Гурвантэс сумын ерөнхий боловсролын сургуулийн Газар зүйн кабинетэд шинжлэх ухааны хичээлд ашиглах биет үзүүлэн, сурах бичгүүдийг хүлээлгэн өгсөн байна. Үүгээр дамжуулан сурагчдыг шинжлэх ухаанд сонирхолтой болгон шинжлэх ухааны мэдлэгийг нь тэлэхээр зорьж байгаа юм.

💁 “МАК Цемент” ХХК: Эрүүл мэндийн даатгал ашиглах тухай гарын авлага бэлтгэжээ

Энэ оны хоёрдугаар сараас эхлэн байгууллагын зүгээс нийт үндсэн ажилтнуудыг жилийн ₮10 саяын эрүүл мэндийн даатгалд хамруулж байгаа билээ. “МАК Цемент” ХХК-ийн Захиргааны хэсгээс нийт ажилтнууддаа даатгалын талаар мэдээлэл өгөх зорилгоор дараах гарын авлагыг бэлтгэжээ.

Та бүхэн магадлан итгэмжлэгдсэн улсын болон хувийн хэвшлийн аль ч эмнэлгээс үйлчилгээ авахдаа эрүүл мэндийн даатгалаа ашиглах боломжтой. Тодруулбал, “МИГ Даатгал” ХХК-ийн гэрээт эмнэлгүүдээс үйлчилгээ авах бол урьдчилан төлбөрийн баталгаа гаргуулах боломжтой. Харин бусад эмнэлгээр үйлчлүүлэхдээ холбогдох баримт, бичгүүдийг бүрдүүлэн төлбөрөө нөхөн авч болох юм.

💁 “МИГ Даатгал” ХХК нөхөн төлбөрийн аппликейшнтэй болжээ

“МИГ Даатгал” ХХК нөхөн төлбөр авах хүсэлт үүсгэн, аль шатанд явж байгааг нь хянах боломжтой аппликейшн хэрэглээнд нэвтрүүлсэн байна. Ингэснээр материал бүрдүүлэх явцыг хөнгөвчлөхөөс гадна, таны илгээсэн и-мэйлд хариулахгүй удах зэрэг даатгуулагчдад тулгардаг асуудлуудыг богино хугацаанд шийдэх боломжтой болжээ 👍

Дэлхийн хамгийн өндөр ашиг, орлоготой Youtube суваг болох “Cocomelon” жилд зөвхөн зар сурталчилгаанаас $820 саяыг олдог гэнэ. 2006 оноос эхлэн тасралтгүй үйл ажиллагаа явуулж буй уг суваг нь одоогоор 185 сая дагагчтай мөн нийт 1300 гаруй хүүхэлдэйн киног бүтээснээр дэлхийн улс үндэстэн бүрийн хүүхэд багачуудын хамгийн үзэх дуртай суваг болсон билээ 📱

АНУ-ын “Joby Aviation” болон Японы “Toyota” компанийн хөрөнгө оруулалтаар бүтсэн нисдэг такси Япон улс дахь анхны туршилтын нислэгээ хийлээ. Энэхүү цахилгаан тээврийн хэрэгсэл нь бүтэн цэнэгээрээ 240 км туулах боломжтой аж. Түүнчлэн 321 км/ц хүртэл хурдлах хүчин чадалтай ба энгийн нисдэг тэргүүдээс 100 дахин бага чимээ гаргадаг тул хотод зорчиход асуудалгүй гэжээ 🚁

Та бүхэн дараах ажлын байруудад тохирно гэж үзэж буй найз нөхөд, танилууддаа эдгээр зарыг түгээж хүний нөөц бүрдүүлэлтэд хувь нэмрээ оруулаарай 🤩

Та орон зайн байршлаас үл хамааран компанийнхаа идэвхтэй үйл ажиллагаа явуулж буй үйлдвэр, уурхайгаар зочлох боломжтой гэдгийг мэдэх үү? 🤭 Makers News цахим товхимолд “360 аялал” нэмэгдсэн шүү. Аж үйлдвэрийн салбарт шинэ жишиг тогтоож буй МАК компанийн бүтээн байгуулалтуудаар хамтдаа аялцгаая 👇

"Makers News" цахим товхимолд и-мэйл хаягаа бүртгүүлснээр компанийн үйл ажиллагаа, дотоод арга хэмжээ, үйл явдлууд, улс эх оронд өрнөж буй хамгийн чухал, анхаарал татсан мэдээ мэдээллүүдийг нэг дороос унших боломжтой шүү 🙌

Та бүхэн шинэ ажилтан, ширээний найзууддаа дуулгаарай 📢