- Makers News
- Posts
- Makers News #79
Powered by
Шинэ сарын мэнд ээ! МАК-чууд бидний хувьд уул уурхайн томоохон төслүүдийн түүхэн ой тохиосон, үйл явдлуудаар дүүрэн 7 хоног өнгөрлөө. Ингээд шинэ дугаараа хүлээн авцгаая 👋
🏗️ Цагаансуварга, Дорнод МАК уурхайн үйл ажиллагаа эхэлсний 12 жилийн ой тохиож байна
Цагаансуварга төслийн талбай /Дорноговь аймаг, Мандах сум/ - 2012.07.31
Одоогоос 12 жилийн өмнө буюу 2012 оны 7-р сарын 31-ний өдөр Цагаансуваргын ил уурхайд BucyrusRH120 маркийн 15м3 багтаамжтай экскаватор, Белаз-75306 маркийн 220 тн даацтай 3ш автосамосвалаар хөрс хуулалтын үйл ажиллагааг хийж, энэхүү төслийн бүтээн байгуулалтыг албан ёсоор эхлүүлж байсан түүхтэй.
Цагаансуварга төслийн талбайд - 2012.07.31
МАК компани 1999 онд зохих шалгууруудыг хангаснаар Цагаансуваргын ордод хайгуул хийх тусгай зөвшөөрөл авч, нийт 8.3 тэрбум төгрөгийн хөрөнгө оруулалтаар нарийвчилсан хайгуул хийж, 1.6 сая тонн зэс, 66 мянган тонн молибденийн нөөцийг Монгол Улсын ашигт малтмалын нөөцөд бүртгүүлж байсан юм.
Цагаансуваргын хүдрийн ил уурхай, уулын баяжуулах үйлдвэр болон катодын зэсийн төслийн хүрээнд 1,300 гаруй хүнийг байнгын ажлын байраар хангаж, 100-150 туслан гүйцэтгэгч компаниар дамжуулан 5,000-7,500 ажлын байр шинээр бий болох тооцоо бий. Энэхүү төсөл нь улс, орон нутгийн төсөвт жилд дунджаар $150 саяын татвар, хураамж төвлөрүүлж, Монгол улсад нийт $4 тэрбумын татварын орлого бий болгох боломжтой юм.
Дорнод МАК уурхай
Түүнчлэн 2012 оны 5-р сарын 12-нд Дорнод МАК нүүрсний ил уурхайн газар хөндөх ёслол болж, мөн оны 8-р сарын 2-ны өдөр хөрс хуулалтын үйл ажиллагааг CAT 365 экскаватор, Белаз-75131 маркийн автосамосвалаар эхлүүлж байсан түүхтэй.
🏗 Intranet.mak.mn сайтаас татаж авах боломжтой мэдээллүүд
Та бүхэн өдөр тутмын үйл ажиллагаанд хэрэгтэй файлуудаа www.intranet.mak.mn сайтаас татан авах боломжтой шүү. Тодруулбал, дизайны файлууд, хүний нөөцийн маягт, дотоод албан бланк, шинэ ажилтны гарын авлага зэргийг татаж ашиглах боломж бүрэн дүүрэн нээлттэй байна. Түүнчлэн байгууллагын бүх дотоод дүрэм, журам уг сайтад байршсан гэдгийг сануулъя 😇
👩⚕️ Эрүүл мэндийн оношилгоонд хамрагдаарай
eMonos эмийн цахим худалдааны платформтой байгуулсан хамтын ажиллагааны хүрээнд 8-р сарын 8,9-ний өдрүүдэд төв оффист үнэ төлбөргүй эрүүл мэндийн үзлэг, оношилгоо хийхээр боллоо. Энэ үеэр шүдний эмчийн үзлэг, цусан дахь сахар хэмжих, кальцийн түвшин, биологийн нас, булчингийн масс тогтоох зэрэг олон үйлчилгээ үзүүлнэ. Түүнчлэн клиникийн профессор, тэргүүлэх зэргийн эмч ₮20,000 төлбөртэйгөөр хэвлийн эхо оношилгоо хийх юм байна.
Та бүхэн идэвхтэй хамрагдаарай. 🩺
👩🏫 “Дотоод сургагч багш” хөтөлбөр 3 дахь жилдээ
3 дахь жилдээ хэрэгжиж буй “Дотоод сургагч багш” бэлтгэх хөтөлбөрийн энэ оны элсэлтэд нийт 50 гаруй ажилтан бүртгүүлж, 15 ажилтан шалгарлаа. Эдгээр ажилтнууд сургагч багш бэлтгэх ур чадварын сургалтад хамрагдаж байна.
💁 НСУ: Хэнтий аймагт нээлттэй ажлын байрны өдөрлөг зохион байгууллаа
Нарийнсухайтын уурхайн хамт олон Хэнтий аймгийн Хөдөлмөр халамж, үйлчилгээний газартай хамтран 7-р сарын 30-ны өдөр "Нээлттэй ажлын байрны өдөрлөг" зохион байгууллаа. Энэ үеэр арга хэмжээнд хүрэлцэн ирсэн иргэдэд компанийн үйл ажиллагааны талаар мэдээлэл өгсөн бөгөөд 20 иргэн ажилд орох анкет бөглөж, анхан болон 2-р шатны ярилцлагад орсон байна. Ингээд 13 ажил горилогч анкетын шалгаруулалтад тэнцжээ 👏
💪 Цементийн үйлдвэрийнхэн хүч бяраа сорин өрсөлдөв
“МАК Цемент” ХХК-ийн хамт олон 7-р сарын 29-ний өдөр олс таталтын тэмцээн зохион байгуулсан байна. Нийт 9 баг 2 хэсэгт хуваагдан өрсөлдсөнөөс
🥇 I байр: Чулуунцар үйлдвэрлэх хэсэг
🥈 II байр: Шохой үйлдвэрлэх хэсэг
🥉 III байр: Цемент үйлдвэрлэх хэсэг
🎖️ IV байр: Ерөнхий технологийн хэсэг шагналт байрт шалгарсан байна. Баг тамирчдад баяр хүргэе 👏
Аж үйлдвэр, Эрдэс баялгийн сайд тамгаа гардан авлаа 🤝
Монгол Улсын Ерөнхий сайдын захирамжаар Аж үйлдвэр, Эрдэс баялгийн сайдаар УИХ-ын гишүүн Ц.Туваан томилогдож, тамгаа гардан авлаа. Тэрээр, Монгол Улсын эдийн засагт эрдэс баялгийн салбарын оруулах хувь нэмрийг аж үйлдвэрийн салбарын хамтаар хөгжүүлнэ гэдгээ илэрхийлсэн байна.
Улсын хилээр зорчигчдын тоо өссөөр байна 📈
Монгол Улсын хилээр энэ оны эхний хагас жилд давхардсан тоогоор 3.07 сая зорчигч нэвтэрчээ. Энэ нь өмнөх оны мөн үеэс 45% өссөн үзүүлэлт юм. Харин давхардсан тоогоор манай улсын 1.2 сая иргэн гадаадад зорчсон ба энэ нь өмнөх оны мөн үеэс 46.7% өссөн үзүүлэлт болжээ.
Нийслэлийн цэцэрлэгийн цахим бүртгэл эхэллээ 👦👧
Нийслэлийн цэцэрлэгийн бүртгэлийн хүсэлтийг 08/01-нээс E-Mongolia системээр хүлээн авч эхлээд байна. Хэрвээ та уг системээр дамжуулан цэцэрлэгийн бүртгэлийн хүсэлт явуулах боломжгүй бол харьяа дүүргийн цэцэрлэг дээр ажиллаж буй ажлын хэсэгт хандаж зөвлөгөө, дэмжлэг авах боломжтой юм байна шүү.
Иргэний шилжилт хөдөлгөөнийг түр зогсооно 🗳️
Аймаг, нийслэл, сум, дүүргийн Иргэдийн Төлөөлөгчдийн Хурлын 2024 оны ээлжит сонгууль 10-р сарын 11-нд болно. Үүнтэй холбоотойгоор иргэний шилжилт хөдөлгөөнийг 8-р сарын 12-ны өдрөөс эхлэн зогсоох аж. Мөн шилжилт, хөдөлгөөнийг хороон дээр хийхээ больж нэг цэгийн үйлчилгээ болон улсын бүртгэлийн 28 цэгт хийдэг болжээ.
Хурдны зам барих олон улсын тендер зарлана 🛣️
Баянзүрхийн товчооноос Дархан-Уул аймаг явах хурдны замтай холбогдсон 35 км трасс зам барих гэж байна. Түүнчлэн тус замаас эх авч Их тойрууг тойрсон тойрог хурдны замыг байгуулах ажлын олон улсын зөвлөх үйлчилгээний тендерийн эх үүсвэрийг улсын төсөвт суулгахаар болжээ.
 Монголын музей дэлхийд Монголын Үндэсний музей, Богд хааны ордон музей, Г.Занабазарын нэрэмжит Дүрслэх урлагийн музей, Монголын Уран зургийн галерей, Монгол цэргийн музей зэрэг зургаан байгууллагын 52 сэдэв бүхий 645 мэдээллийг “Google Arts & Culture”-д байршуулж, зарим музейг виртуал хэлбэрээр үзэх боломжтой болжээ. |  Тамгагүй төр дэлхийд гарав "Монгол Хаан" жүжгийн график романы борлуулах эрхийг Сингапурын “Times Distribution” компани авлаа. Ийнхүү, Монголын нэрт зохиолч Б.Лхагвасүрэнгийн бүтээл “Тамгагүй төр” жүжиг “Монгол Хаан” нэрээр Англи, Испани, Сингапур, Латин Америкийн зарим улсад график ном хэлбэрээр худалдаанд гарахаар боллоо. |
 Эвхэгддэг iPhone айсуй Apple компани анхны эвхэгддэг iPhone гар утсаа 2026 онд худалдаанд гаргахаар төлөвлөж байна. Уг загварын хөгжүүлэлт эхний шатандаа явж байгаа тухай “Apple” компани энэ оны хоёрдугаар сард мэдээлж байсан бол өдгөө загвараа эцэслэж, Азийн зарим гар утас үйлдвэрлэгч компаниудтай холбогдож эхэлжээ. |  “Inside Out 2” рекорд тогтоов Inside Out 2 кино дэлхий даяар $1.46 тэрбумын орлого олж, бүх цаг үеийн хамгийн өндөр орлоготой анимэйшн боллоо. Үүнээс өмнө “Frozen 2” анимэйшн $1.45 тэрбумын орлогоор энэхүү амжилтыг эзэмшиж байсан юм. Түүнчлэн Inside Out 2 нь бүх цаг үеийн хамгийн их орлого олсон киноны жагсаалтын 13-р байрт бичигдэж байна. |
“Парис 2024” зуны олимпын наадмын албан ёсны дуу “Hello World”-ийг та сонссон уу? Энэхүү уран бүтээлийг Грэммигийн шагналт Гвэн Стэфани, Андерсон Паак нар хамтран дуулсан юм. Сонороо мялаацгаая 🤗
"МАК Цемент" ХХК 2017 онд ашиглалтад орох үед сэлгээний 1 зүтгүүр, 10-н хопер вагонтой төмөр замын тээврийн үйл ажиллагаагаа эхлүүлж байсан. Харин өдгөө 182 хопер вагон, сэлгээний ТЭМ маркийн 1ш зүтгүүрээр Олон овоо өртөөнөөс Сэлэнгэ өртөө хүртэлх зайд УБТЗ-аар цемент тээврийн үйл ажиллагаа явуулж, улсынхаа бүтээн байгуулалтад хувь нэмрээ оруулан ажиллаж байна. Бид бүхэн нийслэл, орон нутаг даяар баригдаж буй барилга, зам талбайн хамгийн гол түүхий эдийг тогтвортой тээвэрлэн, хэрэглэгчийн гарт хүргэн ажиллаж байгаадаа таатай байна.
🚆“МАК ТӨМӨР ЗАМ"-ын хамт олон, нийт төмөр замчиддаа мэргэжлийн баярын мэндийг өргөн дэвшүүлье 👏
Олон нийтэд нээлттэй зарлагдсан ажлын байрны заруудыг 7 хоног бүр Makers News цахим товхимлоор танилцуулж байхаар боллоо. Та бүхэн дараах ажлын байруудад тохирно гэж үзэж буй найз нөхөд, танилууддаа эдгээр зарыг түгээж хүний нөөц бүрдүүлэлтэд хувь нэмрээ оруулаарай 🤩
Та орон зайн байршлаас үл хамааран МАК-ийн идэвхтэй үйл ажиллагаа явуулж буй үйлдвэр, уурхайгаар зочлох боломжтой гэдгийг мэдэх үү? 🤭 Makers News цахим товхимолд “360 аялал” нэмэгдсэн шүү. Аж үйлдвэрийн салбарт жишиг тогтоож буй МАК компанийн бүтээн байгуулалтуудаар хамтдаа зочилцгооё 👇
