Makers News #75

Хүүхдийн паркын цоо шинэ цэцэрлэгт хүрээлэн нээлтээ хийлээ 🌳 

Рио Тинто Монгол компани Хүүхдийн паркийн баруун жигүүрийн нийтийн эзэмшлийн 10.2 га газарт ногоон цэцэрлэгт хүрээлэн байгууллаа. Бүтээн байгуулалтын хүрээнд задгай ногоон театр, хүүхдийн тоглоомын талбай, иргэдийн тухлах сандал, сүүдрэвч болон өөрийгөө нөхөн сэргээх чадвартай усалгааны бүрэн систем, цөөрөм зэрэг иж бүрэн тохижилт хийж, 40 мянга гаруй мод бутыг үе шаттайгаар тарьж, талбайн 80 хувийг зүлэгжүүлжээ.

“Улаанбаатар төмөр зам” ХНН оны эхний хагас жилд 16.4 сая.тн ачаа тээвэрлэжээ 🚞

Энэ нь өнгөрсөн оны мөн үеэс 3.3% өссөн үзүүлэлт юм. Эхний хагас жилд импортын 1.9 сая.тн, экспортын 5.5 сая.тн, орон нутгийн 6.4 сая.тн, дамжин өнгөрөх 2.6 сая.тн ачааг тус тус тээвэрлэсэн байна.

Хүй долоон худаг руу вагоноор явах боломжтой 🚉

Үндэсний их баяр наадмын өдрүүдэд буюу 7-р сарын 11, 12-нд Улаанбаатар – Давааны зөрлөг – Улаанбаатар чиглэлд гурван вагонтой зорчигчийн галт тэрэг үйлчилнэ. Тодруулбал,

Улаанбаатар хотоос 09:00, 14:30, 19:10 цагт явж, Давааны зөрлөгт 09:55, 15:25, 20:05 цагт очно.

Давааны зөрлөгөөс 12:30, 16:40, 21:25 цагт хөдөлж, Улаанбаатарт 13:20, 17:30, 22:15 цагт ирэх аж.

Чингис хаан нисэх буудал руу нийтийн тээврийн автобус явж эхэллээ 🚌

Тодруулбал, Х:19 “Чингис хаан нисэх буудал-Сүхбаатарын талбай” чиглэлд том хүн 15,000 төгрөгөөр, хүүхэд 7,000 төгрөгөөр, Х:20 “Чингис хаан нисэх буудал-Буянт-Ухаа спорт цогцолбор” чиглэлд том хүн ₮10,000, хүүхэд ₮5,000-аар үйлчлүүлэх боломжтой аж.

9 дэх удаагийн парламентын гишүүдийн талаарх баримт 🏛️

Энэ удаагийн УИХ түүхэндээ хамгийн олон буюу 32 эмэгтэй гишүүнтэй. Мэргэжил боловсролын хувьд инженер 17, хуульч, эрх зүйч 29, бизнес, эдийн засаг, санхүүгийн чиглэлийн 40, хэл судлал, гадаад харилцааны чиглэлийн 8, багш 8, эмч 5, сэтгүүлч 5, улс төр судлаач 4, геологич, дизайнер, жүжигчин, зураач, социологич, физикч зэрэг мэргэжилтнүүд сонгогджээ. Мөн шинээр сонгогдсон гишүүдийн хамгийн залуу гишүүн 27 настай бол хамгийн ахмад нь 73 настай.