- Makers News
- Posts
- Makers News #74
Powered by
Баасан гарагийн мэнд! Маргааш иргэн бүр Үндсэн хуулиар олгогдсон эрхээ эдэлж, улс орныхоо ирээдүйг тодорхойлох чухал өдөр. Та бүхэн сонгуульдаа идэвхтэй оролцоорой. 😇
👩🎓 “MAK Internship“ хөтөлбөрт нийт 20 оюутан хамрагдаж байна
Компанийн хүний нөөцийн төлөвлөлтийн хүрээнд хамтран ажиллаж буй их сургууль, МСҮТ, коллежийн оюутнуудаас сонгон шалгаруулсан 20 оюутан үйлдвэр, уурхайд дадлагажиж байна. Хөтөлбөрийн төгсгөлд эрдэм шинжилгээний хурал зохион байгуулж, шилдэг судалгааны ажлыг тодруулан сургалтын тэтгэлэг олгож, цаашлаад ажлын байраар хангах юм.
🌳 “МАК Цемент” ХХК мод үржүүлгийн хүлэмжтэй боллоо
“МАК Цемент” ХХК үрээр мод үржүүлэх хүлэмжтэй боллоо. Ингэснээр говийн бүсийн ногоон байгууламжийг нэмэгдүүлэх, нөхөн сэргээлт хийх ажлыг эрчимжүүлэх боломжтой болж байгаа юм. Түүнчлэн оюутнуудыг дадлагажуулж, ажил гүйцэтгэхэд шаардлагатай ур чадварыг мэргэжлийн инженер, техникийн ажилтнууд олгон удирдан чиглүүлж байна. Сонирхуулахад, “МАК Цемент” ХХК нь үйлдвэрийн орчинд 12 га талбайд 65,000 мод тарьж ургуулаад байгаа юм.
🗳️ ЗӨВЛӨМЖ: Саналаа өгөхдөө юу анхаарах вэ?
Та бүхэн саналаа өгөхдөө дараах зүйлсийг анхаараарай. 👇
Саналын хуудаснаас нэр дэвшигчдийг мандатын тоотой тэнцүү тоогоор дугуйлна гэж хуульд заасан. Жишээ нь, 10 мандаттай тойрогт санал өгч байгаа бол нэр дэвшигчдээс 10 хүний нэрийн урд талыг дугуйлна. Илүү болон дутуу дугуйлж болохгүй.
Саналын хуудсаа балласан, буруу бөглөсөн тохиолдолд ахин нэг удаа авах боломжтой.
Санал өгөхдөө иргэний үнэмлэх болон бусад холбогдох баримт бичгээ авч очно. Хурууны хээ уншигдахгүй тохиолдолд иргэний үнэмлэхээрээ саналаа өгнө.
Санал хураалт 07:00 цагт эхлэх ч хэсгийн хороод дээр нээлтийн үйл ажиллагаанаас гадна явуулын хайрцгаар авсан саналын хуудсыг уншуулна гэх мэтчилэн дор хаяж 30 минутын ажил болох тул сонгогчид хамгийн эхэнд очсон ч бага зэрэг хүлээлт үүсэж болзошгүй.
ТАНИЛЦ: Сонгуулийн санал өгөх байршлуудын мэдээлэл ✅
Та бүхэн энд дарж, сонгуулийн санал авах байршлын дэлгэрэнгүй мэдээллийг аваарай. Харин Улаанбаатар хотод санал өгөх иргэд энд даран регистрийн дугаар, хаягийн мэдээллээ оруулж, яг аль байранд санал өгөхөө мэдэж аваарай. Дашрамд дурдахад, сонгогчид тойргийн нэр дэвшигчдийг сонгох болон нам, эвслийг сонгох хоёр саналын хуудас бөглөнө. Хэрвээ мандатын тооноос илүү, дутуу сонголт хийвэл автоматжуулсан систем уншихгүй бөгөөд сонгогчид саналын хуудсыг нэг удаа дахин авах боломжтой юм байна.
Jade Gas-ийн өрөмдлөгийн ажил амжилттай дууслаа 🏗️
Монголд метан хийн хайгуул хийж буй Jade Gas Баруун наран дахь өрөмдлөгийн ажлаа амжилттай дуусгажээ. Тус ажлын хүрээнд 7 цооног өрөмдсөн байна. Түүнчлэн тус компани Өмнөговь аймгийн Улаан нуурын ойролцоох талбайд метан хийн олборлолтоо эрчимжүүлэхээр зорьж байгаа аж.
“Улаан уул” төслийн хүрээнд 4 цооногоос алт, зэсийн өндөр эрдэсжилт илрүүллээ 👏
Xanadu Mines компани Дорноговь аймаг дахь зэс-алтны “Улаан уул” төслийг 100% эзэмшдэг бөгөөд төслийн хайгуулын өрөмдлөгийн үр дүнд бүх цооногоос зэс, алтны өндөр эрдэсжилт илрүүлснээ мэдээллээ. Ийнхүү өрөмдлөгийн үр дүн сайн гарснаар Xanadu Mines дараагийн шатны өрөмдлөгийг 2024 оны II хагаст эхлүүлэх боломжтой болсноо онцолсон байна.
Парис-2024 олимпод манай улсын 32 тамирчин оролцоно 🏟️
Манай улс энэ жилийн олимпын наадмын жүдо бөхийн төрөлд 10, чөлөөт бөхийн төрөлд 8 тамирчнаа илгээнэ. Харин боксын төрөлд ердөө 2 эмэгтэй тамирчин оролцох эрхээ аваад буй. Мөн монголчууд анх удаа Олимпын наадмын дугуйн төрөлд өрсөлдөх эрх авч чадсан нь түүхэн үйл явдал болоод буй.
Үндэсний баяр наадмын тасалбарыг 7-р сарын 1-ээс борлуулж эхэлнэ 😇
Үндэсний баяр наадмын тасалбар суудлаасаа хамаарч ₮80,000-₮150,000-ийн үнэтэй байна. Энэ жил 12,000 ширхэг тасалбар борлуулах аж. Өнөөдрийн байдлаар баяр наадмын бэлтгэл ажил 80%-тай явж байгаа бөгөөд Төв цэнгэлдэх хүрээлэнд авто зогсоол шинээр байгуулах, зам засах зэрэг ажлууд үргэлжилж буй.
 Монголбанк устсан амьтныг зоосонд мөнхлөв Монголбанкнаас гаргасан “Nimravidae” дурсгалын зоос “Best Paleo Coin Award”-ыг авлаа. Улаан алтаар хэсэгчлэн бүрсэн 38.61 мм диаметртэй, 31.1 гр жинтэй, мөнгөн дурсгалын зоосон дээр дүрсэлсэн “Nimravidae” нь муураас гаралтай махчин амьтдын устаж үгүй болсон төрөл юм. Тэд 50 сая жилийн өмнө үүссэн бөгөөд анх муурын өвөг дээдэс гэж үздэг байсан бол өнөөдөр тэднийг муурын эгч дүүс гэж үздэг. |  105 насандаа Стэнфордыг төгсжээ 105 настай Виржиниа Хислоп 1941 онд дүүргэсэн хөтөлбөрөө ахиулан Стэнфордын магистрын зэрэг хамгаалж, дипломоо гардан авчээ. Сургуулийн захирал Даниэль Шварц Вашингтон мужид сургууль, коллеж, их дээд сургуулиудын удирдах зөвлөлийн гишүүнээр ажиллаж байсан Виржиниа Хислопыг "Тэгш боловсрол, суралцах боломжийг тууштай дэмжигч" хэмээн тодорхойлжээ. |
 Amazon шинэ AI хөгжүүлж байна Amazon ChatGPT-тэй өрсөлдөхүйц AI чатботыг хөгжүүлж байна. Metis нэртэй уг чатбот нь энэ оны сүүлээр хэрэглээнд нэвтрэх төлөвтэй байгаа аж. Ингэснээр Amazon AI-д суурилсан шинэ үйлчилгээ үзүүлж буй Microsoft, Google зэрэг технологийн аварга компаниудын эгнээнд нэгдэх нь. |  Дэлхийн хамгийн царай муутай нохой Дэлхийн хамгийн царай муутай нохой шалгаруулах тэмцээн Петалума хотын Сонома-Марины үзэсгэлэнд саяхан болж, шилдгээ шалгаруулжээ. Хамгийн царай муутай нохойгоор 8 настай Бээжин хав үүлдрийн Зэрлэг Танг шалгарч, 5000 долларын шагнал хүртсэн байна. |
Евро-2024 хөлбөмбөгийн аварга шалгаруулах тэмцээний үеэр нэгэн хүү хамгаалалтыг сэтлэн талбайд гарч, Роналдутай сельфидэж амжлаа. Хамгаалалтын албаныхан хүүг барих гэж талбай дундуур хөөсөн боловч мөрөөдлийн тамирчинтайгаа сельфидэж чадсан хүү гар утсаа атган зугтсаар талбайгаас гарч буй бичлэг дэлхий дахинаа түгээд байна. ⚽
