Makers News #65

🎮 E-Sport-ийн аваргууд Ням гарагт тодорно

May 03, 2024

Powered by

Баасан гарагийн мэнд хүргэе! Тэмцээн уралдаан ихтэй “завгүй” долоо хоног өнгөрч байна. 😇 Түүнчлэн МАК-ийн спортын уралдаан тэмцээнүүд тун удахгүй ээлж дараалан болох нь ээ. Та бүхнийг бэлтгэлээ хангаж байгаа гэж найдъя 🤭

🌐 Intranet.mak.mn сайтыг хэрхэн ашиглах вэ?

МАК-чууд та бүхний өдөр тутмын хэрэгцээнд зориулан бүтээсэн www.intranet.mak.mn сайтыг хэрхэн ашиглах тухай зааврыг хүргэж байна. Компанийн дотоод үйл ажиллагаатай холбоотой мэдээлэл, дүрэм журам, зураг, видео контентууд зэргийг нэг дороос үзэх боломжтой шүү. 😇

🕙 Цагийн бүртгэл сар бүрийн 28-аар гардаг боллоо

Хөдөлмөрийн дотоод журамд орсон өөрчлөлтийн дагуу ажилтнуудын цагийн бүртгэлийг сар бүрийн 28-ны өдрөөр тасалбар болгон гаргадаг боллоо. Тиймээс та бүхэн 28-ны өдрөөс өмнө гадуур ажил, томилолт, ээлжийн амралт, өвчний чөлөө, цалинтай болон цалингүй чөлөөний мэдээллээ ERP системд оруулж хэвшээрэй.

Цагийн хүсэлт оруулахдаа ERP систем→Хувийн хуудас→Цагийн бүртгэл→ Цагийн хүсэлт үүсгэх→Батлах гэсэн дарааллаар хүсэлтээ илгээнэ үү.

🎮 MAK E-Sports 2024 Championship тэмцээн амралтын өдрүүдэд болно

Компанийн ажилтнуудын сонирхлыг дэмжиж, цахим спортыг хөгжүүлэх зорилготой "MAK E-sports Championship - 2024" тэмцээн энэ амралтын өдрүүдэд /5-р сарын 4-5/ UG Arena-ийн 2 давхарт байрлах QUBE E-Gaming Lounge-д болох гэж байна.

Энэ удаагийн тэмцээн

  • DOTA 2

  • Counter Strike 2

  • Mobile Legends гэсэн гурван төрлөөр зохион байгуулагдах юм.

Баг, тамирчид та бүхэн бэлтгэлээ ханган идэвхтэй оролцоорой. 😊

🔔 НСУ: “Алтан хонх” тэмцээн зохион байгууллаа

Нарийнсухайтын уурхайн ХАБЭАБО-ны хэсгийн хамт олон “Дэлхийн ажлын байрны аюулгүй байдал, эрүүл ахуйн өдөр”-ийг тохиолдуулан "Алтан хонх" танин мэдэхүйн тэмцээн зохион байгууллаа. Тэмцээний ялагчаар,

🥇I байрт: Д.Бямбадаваа, Цахилгааны хэсгийн үйлдвэрийн цахилгаанчин

🥈 II байрт: Д.Цогтбаяр, Төлөвлөлтийн хэсгийн засварын диспетчер

🥉 III байрт: О.Оргил, Цахилгааны хэсгийн дэд станцын техникч нар тус тус тодорчээ. Баяр хүргэе 👏

🎮 “МАК Цемент” ХХК: АХА тэмцээн зохион байгуулав

“МАК Цемент” ХХК-ийн хамт олон Хөдөлмөрийн аюулгүй байдал, эрүүл ахуйн сарын аяны хүрээнд нийт ажилтнуудынхаа дунд АХА тэмцээн зохион байгуулжээ. Тэмцээний ялагчаар дараах ажилтнууд тодорсон байна.

🥇 I байр: Б.Энхтүвшин, ЭХХ-ийн Автоматжуулалтын ахлах инженер

🥈 II байр: Х.Энхжин, ААХ"-ийн Зочлохуй үйлчилгээний ажилтан

🥉 III байр: Ө.Цэндсүрэн, Уулын хэсгийн уулын мастер

👨‍🏫 МАК Цемент ХХК-ийн харваачид аймгийн аваргад III байр эзэллээ

Н.Гантулга ахлагчтай “МАК Цемент” ХХК-ийн шагайн харвааны баг Сайншанд хотноо зохион байгуулагдсан Дорноговь аймгийн аварга шалгаруулах тэмцээнд амжилттай оролцож, гуравдугаар байр эзэлсэн байна. Уг тэмцээнд 30 багийн 240 гаруй харваач оролцон цэц мэргэнээ сорин өрсөлджээ.

Нефтийн үйлдвэр ба хуулийн өөрчлөлт ⚖️

ААН-ийн орлогын албан татварын тухай хуульд нэмэлт өөрчлөлт оруулах тухай хуулийн төслийг УИХ-д өргөн мэдүүллээ. Монголд баригдаж буй газрын тос боловсруулах үйлдвэр нь бүтээгдэхүүн хуваах гэрээ байгуулах боломжгүй тул орлогын албан татвараас чөлөөлөх хууль эрх зүйн орчныг бүрдүүлэх нь зүйтэй гэж хууль санаачлагчид үзсэн байна.

Эмээлт эко аж үйлдвэрийн паркийн ТЭЗҮ-г баталлаа 👏

Төсөл ирэх жилээс эхлэн 15 жил буюу 2039 он хүртэл хэрэгжих бөгөөд барилга угсралтын ажил нь 3 жил үргэлжлэх юм. Ингэснээр арьс ширний чанар сайжирч, түүхий эдийн хаягдал багасаж, 2022 онд 1 арьсыг $2-оор экспортолдог байсан бол 2039 онд $8 болгох хүлээлттэй байгаа юм.

“Гурвантэс XXXV” төслийн ахиц 🙂

TMK Energy өнгөрсөн I улиралд байгалийн хийн “Гурвантэс XXXV” төслийг 100% эзэмших үйл явцаа амжилттай дуусгасан байна. Түүнчлэн тус төсөл нүүрсний давхаргын метан хийн дэлхийн түвшний төсөл болоход шаардлагатай бүхий л техникийн шинж чанараа хангасан аж. Цаашлаад энэ онд 2-3 үйлдвэрлэлийн цооног нэмж өрөмдөхөөр төлөвлөжээ.

Нийслэлийн үнэт цаас гаргах тогтоолын төслийг батлав 💸

Нийслэл хот дотоодын зах зээлээс ₮500 тэрбумын бонд босгохоор тооцоолоод буй. Уг бондоос Бөөрөлжүүтийн цахилгаан станц болон бохир усны Туул-1 гол цуглуулагч шугам, замын барилга, байгууламжийн төсөлд хөрөнгө оруулахаар төлөвлөжээ.

Тэрбум модноос 42 саяыг тариад байна 🌳

“Тэрбум мод” санаачилгыг хэрэгжүүлж эхэлснээс хойш буюу өнгөрсөн 2 жилд нийт 42 сая мод тарьжээ. Түүнчлэн 63 сая тарьц, суулгацын нөөц бүрдүүлсэн бөгөөд 2030 он хүртэл нийт 608 сая мод тарьж ургуулахаар батламжилсан аж.

Up-ийн байшинд үнэгүй амрах боломж

Airbnb компани кино сонирхогчдод зориулан агаарын бөмбөлгөөр дүүжлэгдсэн Pixar-ийн Up анимейшний байшинд амрах боломж олгох аялал эхлүүлжээ. Up-ийн байшин нь Нью Мексико мужийн Абику хотод байрлах ба хүсэлт гаргасан үйлчлүүлэгчдээс санамсаргүй байдлаар сонгон үнэ төлбөргүй амраах аж. 

Марафонд Монгол гуталтай гүйжээ

Лондон хотын 44 дэх удаагийн марафонд У.Ганзориг үндэснийхээ гутал, хувцастай 42 км гүйж, Гиннесийн рекордод бүртгүүлжээ. Тэрээр энэ зайг 4:22:59 цагт туулсан юм байна. Энэ удаагийн тэмцээнд орон орны 74 хүн Гиннесийн амжилт тогтоох зорилготой гүйж, 44 нь зорилгоо биелүүлжээ.

Өөрийгөө устгадаг хуванцар

Калифорнийн их сургуулийн эрдэмтэд хуванцар иддэг бактери ашиглан "өөрийгөө устгадаг хуванцар" бүтээснээ танилцууллаа. Тодруулбал, энэ төрлийн хуванцар нь зориулалтын дагуу ашиглах явцад бактери нь "унтаа" байдалд байх бөгөөд ашиглалтын хугацаа дуусаж, хөрсний шим тэжээлтэй холилдох үед сэрж, хөрсөнд бүрэн задрах аж.

Microsoft AI-д хөрөнгө оруулна

"Microsoft" компани Индонезийн хиймэл оюун ухаан, онлайн үйлчилгээнд 1.7 тэрбум ам.долларын хөрөнгө оруулахаар төлөвлөж байна. Гүйцэтгэх захирал Сатя Наделла Индонезид 840 мянган хүнийг хиймэл оюун ухаанд сургаж, тус улсын өсөн нэмэгдэж буй технологи хөгжүүлэгчдийг дэмжих болно гэж мэдэгджээ.

Австралийн баруун эргийн хэсэг рүү 160 гаруй халим гарч гацсан байсныг эргийн хамгаалагчид болон энгийн иргэд хамтран 130-ийг нь далайн усанд буцаасан тухай CNN агентлаг мэдээлжээ. Сонирхуулахад, халим хуурай газарт 6 хүртэлх цаг амьд байж чаддаг юм байна. 🐳