Makers News #60

🏡 MAKBM Event-д хүрэлцэн ирэхийг урьж байна

March 29, 2024

Powered by

Өдрийн мэнд ээ! Аж үйлдвэржилт, барилгын салбарын хөгжлийн талаар хэлэлцэн компанийн ирээдүйд хэрэгжүүлэх төслүүд, шинэ бүтээгдэхүүнүүдээ танилцуулах “MAKBM 2024 Event” ирэх 7 хоногт болох гэж байна. Та бүхэн хүрэлцэн ирж, салбарын шилдэг мэргэжилтнүүдийн сонирхолтой илтгэлүүдийг сонсож, MAKBM шинэ брэндингтэй танилцаарай 😇

📜 Цагаан суварга төсөл, Ашигт малтмалын тусгай зөвшөөрлүүдийн талаарх компанийн албан ёсны мэдэгдэл

Нэр бүхий мэдээллийн сайт манай компанийн талаар удаа дараа нэг талыг барьсан, баримт нотолгоогүй, олон нийтийг төөрөгдүүлэхүйц мэдээлэл түгээсэн тул компанийн зүгээс албан мэдэгдэл гаргалаа. Тус мэдэгдэлд Цагаан суварга төсөл болон Ашигт малтмалын тусгай зөвшөөрлийн тухай тайлбарласан тул нийт ажилтнууд та бүхэн уншиж танилцаарай.

🏡 MAKBM Event-ийн үеэр шинэ брэндинг танилцуулна

Манай компани эх орондоо үйлдвэрлэж буй европ стандартын барилгын материалын шинэ бүтээгдэхүүнүүд болон ирээдүйн төслүүдээ нээлттэй танилцуулах MAK Building Materials 2024 арга хэмжээг ирэх 7 хоногт зохион байгуулах гэж байна. Мөн энэ үеэр барилгын салбарын шилдэг мэргэжилтнүүд цуглаж, салбарын хөгжил, чиг хандлага, сорилт, боломжийн талаар нээлттэй хэлэлцэх юм. Энэхүү арга хэмжээнд оролцсоноор компани барилгын материалын үйлдвэрлэлээ хэрхэн өргөжүүлэх гэж байгаа талаар мэдэх боломжтой. Нийт ажилтнууд та бүхэн идэвхтэй оролцоорой 🤩

  • 📍 Хэзээ: 2024.04.03 09:00-17:00

  • 📍 Хаана: Shangri-La Ulaanbaatar, Ballroom

🌐 Байгууллагын дотоод вэбсайт ашиглалтад орлоо

Компанийн хэмжээнд өрнөж буй үйл явдал, дүрэм журам, дотоод сургалттай холбоотой бүх мэдээллийг нэг дороос авах боломжтой www.intranet.mak.mn сайт ашиглалтад орлоо. Та бүхэн ERP системд бүртгэлтэй и-мэйл хаягаараа нэвтэрч гол мэдээллүүдээ цаг алдалгүй аваарай 👌

🐟 Загасчлалын тэмцээн амралтын өдрүүдэд болно

Нийт ажилтнуудын дунд спорт загасчлалын соёлыг сурталчлан таниулж, хүрээлэн буй орчинд ээлтэйгээр загасчлах талаар мэдлэг түгээх зорилготой Өвлийн спорт загасчлалын тэмцээн энэ амралтын өдрүүдэд болох гэж байна.

“MAK Загасчлалын клуб”-ээс жил бүр уламжлал болгон зохион байгуулдаг уг тэмцээн энэ жил Архангай аймгийн Өгийнуур сумын нутагт орших Өгий нуурт болох юм. Тэмцээнд оролцох сонирхолтой ажилтнууд [email protected] хаягаар мэдээллээ илгээн бүртгүүлээрэй 🤗

👩‍⚕️ НСУ: Хуванцар хаягдлаар сандал, хашааны хаалт хийжээ

Нарийнсухайтын уурхайн хамт олон усны зүй зохистой хэрэглээг сурталчлах зорилгоор нийт ажилтнуудынхаа дунд хог хаягдал, гарын доорх материал ашиглан гар урлал хийх уралдаан зохион байгуулсан байна. Энэ хүрээнд тус уурхайн ААХ-ийн Ахлах ажилтан С.Үүрдмандах, Э.Золзаяа нар усны хаягдал сав ашиглан сандал хийжээ. Мөн хог хийсэж тарахаас сэргийлэн хогийн цэгийн хашааг хаягдал хуванцраар доторлосон байна. Бусад бүтээлүүдийн талаарх мэдээллийг байгууллагын дотоод вебсайтаас үзээрэй 👌

🚘 НСУ: Цахим спортын шилдгүүдээ тодрууллаа

Нарийнсухайтын уурхайн МТХ-ээс зохион байгуулсан Mobile PubG тэмцээнд нийт 9 багийн 36 тамирчин оролцсон байна. Тэргүүн байрт

  • Б.Хишигжаргал, Ачигчийн оператор

  • Б.Лхагва, Гинжит шигшүүр

  • Б.Мягмар, XDF туслах

  • М.Баярболд, FGX24 оператор нар шалгарчээ.

Эрдэнэс Тавантолгойн нөөцийг дахин баталлаа 📈

Эрдэс баялгийн мэргэжлийн зөвлөлийн хурлаар Эрдэнэс Тавантолгой ХК-ийн хайгуулын ажлын үр дүнгийн тайланг хэлэлцэж, ордын нөөцийг 29% нэмэгдүүлж нийт нөөцийг 8.1 тэрбум тонн болгон баталлаа.

Xanadu Mines хайгуулаа эрчимжүүлэв ⚒️

Xanadu Mines компани Дорноговь аймагт орших зэс, алтны "Улаан уул" төсөлдөө 5000 метрийн хайгуулын өрөмдлөг хийж эхэлснээ мэдэгдлээ. Тодруулбал, компани 100% эзэмшдэг тус төслийнхөө таван гол бүсэд төвлөрч, 5000 метрийн гүнд алмазан өрөмдлөг хийн зэс, алтны орд нээн илрүүлэхээр төлөвлөж байна.

Замын-Үүд боомтын өргөтгөл дуусжээ 👏

БНХАУ-ын Засгийн газрын 233.5 сая юанийн буцалтгүй тусламж, улсын төсвийн 30.3 тэрбум төгрөгийн хөрөнгө оруулалтаар гүйцэтгэсэн Замын-Үүд боомтын өргөтгөл, шинэчлэлийн ажил дуусжээ. Тус боомтоор Монгол Улсын нийт экспортын 22%, импортын 49% нь нэвтэрдэг юм.

Улаанбаатарын замын бүтээн байгуулалт 😑

Гачуурт, Улиастайгаас Шархад хүртэлх дөрвөн эгнээ, дөрвөн км замын ажил үргэлжилж байгаа бөгөөд 6-р сарын 30-н гэхэд ашиглалтад оруулахаар төлөвлөж байгаа юм байна. Харин III хорооллын эцсээс Толгойтын уулзвар хүртэлх, зургаан эгнээ, таван нүхэн гарцтай замын ажил 12%-тай байна гэлээ.

Батарей боловсруулах үйлдвэр ашиглалтад оржээ 🤗

Налайх дүүрэгт авто тээврийн хэрэгслийн ашиглалтаас хасагдсан хар тугалгат-хүхрийн хүчлийн батарейг устгах, түр хадгалах, цуглуулах, тээвэрлэх, дахин боловсруулах үйлдвэр байгуулагдлаа. Ингэснээр жилд 7 мянган тн буюу 300-400 мянган ширхэг хаягдал хар тугалгат-хүхрийн хүчлийн батарейг дахин боловсруулж, хаягдал хар тугалгыг 98, хүхрийн хүчлийн уусмалыг 98 хувь, 10 гаруй химийн бодисыг хоргүйжүүлэн цэвэршүүлэх боломжтой болж байна.

Аварга далайн гахайн гавлын яс олдлоо

Судлаачид Амазоноос ойролцоогоор 16 сая жилийн өмнө амьдарч байсан аварга далайн гахайн гавлын яс олжээ. Палеонтологчид түүний бие дор хаяж 3.5 метр урттай байсан хэмээн тооцоолсон бөгөөд энэ нь орчин үеийн төрлөөс 20-25 хувиар илүү том гэсэн үг юм.

Рөүзийг “аварсан” хавтан зарагдлаа

1997 оны “Titanic” киноны зураг авалтад ашигласан 2.4х1м модон хавтанг дуудлага худалдаанд оруулан $718,750-аар заржээ. Үзэгчдийн ихэнх нь хаалга гэж андуурдаг энэ ханын модон хавтанг 1912 онд живсэн Титаник хөлгийн үлдэгдэл эд зүйлсээс санаа авч кинонд ашиглаж байжээ.

Зөөгчдийн уралдаан зохион байгуулжээ

Парис хот ресторан, кафены зөөгчдөө уралдуулж, шилдгийг нь шалгаруулжээ. Тэд гартаа круассан талх, эспрессо кофе, аяга, устай тавиур барин 2 км зайд уралдсан байна. Тэмцээний бүх медальтнууд 7-р сарын 26-ны өдөр тохиох Парисын зуны олимпын наадмын нээлтэд урилгаар оролцохоос гадна тансаг ангиллын зочид буудалд нэг хоног байрлах эрхтэй болжээ.

Та ч бас ашигладаг юм биш биз?

АНУ-ын кибер аюулгүй байдлын Нордпасс байгууллагаас 2023 онд дэлхий дахинаа хамгийн түгээмэл хэрэглэгдсэн 200 нууц үгийг танилцуулжээ. Өнгөрөгч оны хувьд хамгийн түгээмэл нууц үгээр 123456 гэх дараалсан тоонууд тодорчээ. Энэхүү нууц үг нь дэлхий даяар хамгийн өргөн хэрэглэсэн нууц үгсийн жагсаалтыг сүүлийн 5 жилийн турш тэргүүлж байгаа юм.

Массачусетсийн ерөнхий эмнэлгийн эмч нар дэлхийд анх удаа гахайн бөөрийг амьд хүнд амжилттай шилжүүлэн суулгалаа. Ингэхдээ хүний биед сөрөг нөлөө үзүүлэх генийг нь устгасан аж. Өвчтөн нь 62 настай бөөрний дутагдалтай эрэгтэй бөгөөд одоогийн байдлаар биеийн байдал нь сайн байгаа гэж мэдээллээ. 👇