Makers News #59

💳 Makers Card: Голомт банктай хамтарсан карт гарлаа

March 22, 2024

Powered by

Баасан гарагийн мэнд ээ! Цаг агаар дулаараад одоо л хүйтний ам цаашилж, хөхүүрийн ам наашилж байна даа. 😁 Улирал солигдож байгаа энэ үед та бүхэн Эрүүл мэндийн даатгалаа ашиглан эрүүл мэнддээ анхаараарай. 😇

💳 Голомт Банктай хамтарсан Makers Card-ийн захиалга эхэллээ

Голомт банкаар цалингаа авч буй ажилтнууд Makers картаа захиалан авах боломжтой боллоо. Та бүхэн өөрт хамгийн ойр байрлах салбарт ажлын үнэмлэх болон иргэний үнэмлэхээ авч очин картаа захиалаарай.

💰 ТАНИЛЦ: Хас Банкны дижитал банканд бүртгүүлэх заавар

Нийт ажилтнуудыг тэтгэврийн хуримтлалд хамруулах, гэрээ байгуулах ажил 2024 оны 1-р сарын 22-оос хойш үргэлжилж байна. Одоогийн байдлаар тус хөтөлбөрт нийт үндсэн ажилтнуудын 86% нь хамрагдаад байгаа юм. Тэтгэврийн хуримтлалын гэрээ байгуулсан ажилтнууд дараах зааврын дагуу Хас Банкны Дижитал банканд бүртгүүлж, хуримтлалаа хянах боломжтой. 🤗

👩‍⚕️ Энэ онд нийт ажилтнуудыг эрүүл мэндийн үзлэгт хамруулна

Манай компани энэ онд “МИГ Даатгал” ХХК болон Хөдөлмөрийн эрүүл мэнд аюулгүй байдлын төвтэй хамтран нийт ажилтнуудаа эрүүл мэндийн үзлэгт хамруулахаар төлөвлөж байна. Үүнтэй уялдуулан үйлдвэр, уурхай дээр "Хөдөлмөрийн нөхцөлийн үнэлгээ" хийж, мэргэжлээс шалтгаалах өвчний эрт үеийн илрүүлгийн арга хэмжээг зохион байгуулах ажил хэлцлийн шатанд үргэлжилж байна.

Улмаар ирэх 4-р сараас ЭМТҮ-ийн нэгжээс үйлдвэр, уурхайн нийт ажилтнуудыг эрүүл мэндийн үзлэгт хамруулах юм. Иймд ажилчид үйлдвэр, уурхайн эмчдээ эрүүл мэндийн үзлэгийн картаа өгч, бүртгэлдээ хамрагдаарай.

🚘 Дуудлага худалдаанд оролцохыг урьж байна

МАК компанийн ашиглагдсан техник, тоног төхөөрөмжүүдийг дуудлага худалдаагаар борлуулах гэж байна. Уг дуудлага худалдааны үнэ өсгөх хугацаа 2 минут бөгөөд компанийн ажилтнууд и-мэйл хаягаа бүртгүүлэн шууд оролцох боломжтой. Та бүхэн бүртгүүлэхээсээ өмнө заавал үйлчилгээний нөхцөлтэй танилцаарай.

Бүртгэл, дуудлага худалдаатай холбоотой асуулт байвал ХТҮГ-ийн Хөрөнгийн үйл ажиллагаа хариуцсан менежер Э.Цэрэнсодномтой холбогдоорой.

⛹️‍♀️ “Barilga basketball 2024” тэмцээнд “МАК Цемент” ХХК-ийн эмэгтэй баг амжилттай оролцлоо

“МАК Цемент” ХХК-ийн сагсан бөмбөгийн эмэгтэй баг барилгын салбарын аж ахуйн нэгжүүдийн дунд жил бүр уламжлал болгон зохион байгуулагддаг “BARILGA BASKETBALL 2024” тэмцээнд хоёрдугаар байр эзэлсэн байна. Гурван өдрийн турш үргэлжилсэн тус тэмцээнд нийт 42 багийн 400 гаруй тамирчин өрсөлджээ. Багт баяр хүргэе. 👏

👏 МАК Цемент ХХК-ийн Шагайн харваачид дэд байрт шалгарчээ

“МАК Цемент” ХХК-ийн Н.Гантулга ахлагчтай шагайн харвааны баг 3-р сарын 9-ны өдөр зохион байгуулагдсан “Энх мэндийн харваа - 2024” шагайн харвааны тэмцээнд Дэд байрт шалгарчээ. Энэхүү тэмцээнд Монгол Улсын шилдэг 100 багийн 800 гаруй харваач оролцсон байна.

Тэмцээнд амжилттай оролцсон

  • Н.Гантулга, Уулын ерөнхий инженер

  • Э.Мөнхбаяр, Технологич инженер

  • Л.Ганзориг, Зам усалгааны машины жолооч, Монгол Улсын мэргэн

  • Б.Хатанбаатар, Монгол Улсын Үлэмж дархан мэргэн, спортын мастер

  • Ш.Бямбадорж, Гагнуурчин, Аймгийн гоц мэргэн

  • Ц.Нямдаваа, Ачигчийн оператор нарт баяр хүргэе! 🎉

👩‍🎓 НСУ: Цэнхэр тууз аяны хүрээнд дэлхийн усны өдрийг тэмдэглэж байна

Өнөөдөр дэлхийн Усны өдөр тохиож байна. Нарийнсухайтын уурхайн хамт олон энэ өдрийг Усны газраас зарласан “Цэнхэр тууз” аяны хүрээнд тэмдэглэн өнгөрүүлж байна. Тодруулбал, энэ хүрээнд усны зөв, зохистой хэрэглээг сурталчлах зорилгоор нийт ажилтнуудынхаа дунд хог хаягдал, гарын доорх материал ашиглан гар урлал хийх уралдаан зохион байгуулж байгаа юм.

🙏 Хандивын аянд нэгдэхийг уриалж байна

Нийт МАК-чууд та бүхнийг ДАЧХХАБГ-ын ХАБЭА-ны Сургалтын мэргэжилтэн Д.Сумъядоржийн хүү 4 настай С.Сонорт халуун сэтгэлийн дэмжлэг үзүүлэхийг уриалж байна. С.Сонор нь 2023 онд F84.0 Хүүхдийн аутизм өвчнөөр оношлогдсон. Улмаар Турк улсын Сэн Ассистанс эмнэлэгт аутизмын нарийн шинжилгээ өгөх, оношлуулах, нөхөн сэргээх эмчилгээг 30-40 хоногийн хугацаанд хийлгэхээр болсон. Энэхүү шинжилгээ, оношилгооны дараа үүдэл эс шилжүүлэн суулгах эсэх нь шийдэгдэх бөгөөд зөвхөн шинжилгээ, оношилгоо, нөхөн сэргээх эмчилгээнд $17,000 шаардлагатай болсон байна. Иймд нийт МАК-чууд та бүхнийг хандивын аянд нэгдэхийг уриалж байна.

Аж үйлдвэрийн салбарын өсөлт 📈

Аж үйлдвэрийн салбарын нийт үйлдвэрлэл 2-р сарын урьдчилсан гүйцэтгэлээр өмнөх оноос 12% өсөж ₮4.6 их наяд болжээ. Уг өсөлтөд уул уурхайн олборлолт 12.7% өсөж ₮3.2 их наяд, боловсруулах үйлдвэрлэл 9.2% өсөж ₮895 тэрбумд хүрсэн нь тус тус нөлөөлсөн юм.

Зэсийн арилжаа ⚒️

Холбогдох журам батлагдмагц зэсийн арилжаа эхлэхээр байгааг УУХҮЯ мэдээллээ. Энэ оны төсөвт 1.5 сая тонн зэсийг тонн тутамд 9,000 ам.доллароор арилжихаар тусгасан бөгөөд УУХҮЯ 2025 оноос Эрдэнэт Үйлдвэр, Оюутолгойн зэсийн баяжмалын 30-40 хувийг биржээр арилжих зорилт тавиад байгаа юм.

Баялгийн сангийн тухай хууль ⚖️

Ирэх долоо хоногт УИХ-д өргөн мэдүүлэхээр болсон Баялгийн сангийн тухай хуулийн төсөлд Ирээдүйн өв сан, Хуримтлалын нэгдсэн сан, Хөгжлийн сангуудыг хамруулахаар тусгажээ. Ирээдүйн өв сан нь АМНАТ-өөс бүрдсэн орлогын 65 хувиар санхүүжиж, 2030 он хүртэл хуримтлал үүсгэх зорилготой аж.

Улаанбаатарын агаарын чанар сайжирсан гэв 🤔

Швейцарын IQAir агаарын чанарын хяналтын байгууллага дэлхийн 134 улсын 7,812 хотыг хамруулсан “2023 World Air Quality Report” тайлангаа танилцуулжээ. Улаанбаатар хотын хувьд 2023 оны PM2.5 тоосонцрын дундаж хэмжээ 22.5 үзүүлэлтээр хамгийн их бохирдолтой хотуудын 982 дугаарт эрэмбэлэгджээ. Сонирхолтой нь 2018 оноос хойших түүхэн үзүүлэлтүүдийг харахад Улаанбаатар хотын агаарын чанарын үзүүлэлт сүүлийн таван жил дараалан сайжирчээ.

Дэлхийн усны өдөр тохиож байна 💧

Монголчууд 2023 онд нийт 678 сая шоо метр ус ашигласан гэж Усны газраас мэдээллээ. Үүний 50 орчим хувийг Хөдөө аж ахуйн салбарт зарцуулсан бол үлдсэн хувийг нь ундны ус, уул уурхай болон аж үйлдвэрийн салбарт ашиглажээ.

Манай үйлдвэрүүдийн усны зарцуулалт зөвшөөрөгдсөн хэмжээнээс 30-50 хүртэлх хувиар бага гэдгийг та мэдэх үү? 👇

Бодлын хүчээр шатар тоглож байна

“Neuralink” компани энэ оны 1-р сарын 28-нд анх удаа хүний тархинд чип суулгасан. Тэгвэл 8 жилийн өмнө ослын улмаас мөрнөөсөө доош мэдээгүй болсон өвчтөн тухайн чипний ачаар бодлын хүчээр шатар тоглож эхэлсэн байна.

Дэлхийг ажингаа зоог барих нь

Сансрын тансаг аялал зохион байгуулдаг SpaceVIP компани далайн түвшнээс дээш 30 км-ийн өндөрт зоог барих үйлчилгээ санал болгожээ. Дэвшилтэт агаарын бөмбөлгөөр хийгдэх уг хөтөлбөрийн нэг аялал нь 6 зочинтойгоор 6 цаг үргэлжлэх бөгөөд $500 мянгын үнэтэй аж.

Хамгийн эртний уруулын будаг

Археологичид Ираны зүүн өмнөд нутгаас жижигхэн чулуун сав бүхий 4000 жилийн настай уруулын будаг олсноо мэдээллээ. Scientific Reports сэтгүүлд мэдээлснээр энэхүү ховор олдвор нь уруулын будгийн хамгийн эртний хувилбар байх магадлалтай аж. Мөн хүнсний ногоо болон бусад органик нэгдлээс гаргаж авсан вакс хэлбэрийн бодисууд ч олджээ.

Hermès брэндийг шүүхэд дуудав

Калифорни мужийн хоёр иргэн Hermès брэндийг монополын эсрэг хуулийг зөрчсөн хэмээн шүүхэд дуудлаа. Учир нь тус брэнд тансаг зэрэглэлийн Birkin цүнхээ сайт болон дэлгүүртээ зардаггүй бөгөөд зөвхөн төлбөрийн чадвартай гэж үзсэн үйлчлүүлэгчдэдээ тусгайлан санал болгодог юм. Энэхүү цүнх нь хүмүүсийн нийгмийн статус, бэл бэнчинг илтгэх хэрэгсэл болсон ба зах зээлд $100 мянга давсан үнээр зарагдах нь ч бий.

Киргизийн тусгай албаныхан тус улсын хил орчмын айлын гэрээс Узбекистаны нутаг дэвсгэрт хүргэдэг газар доогуурх хоёр хонгил илрүүлснээ мэдээлжээ. Хонгилуудыг ашиглан бараа бүтээгдэхүүн зөөх, хүмүүсийг хил нэвтрүүлэх хууль бус ажиллагаа явуулдаг байжээ. 👇