Makers News #54

МАК-чууд эрүүл мэндийн даатгалтай боллоо 😇

February 16, 2024

Powered by

Баасан гарагийн мэнд! Та жилийн ₮10 саяын нөхөн төлбөр бүхий эрүүл мэндийн даалтгалтай болсноо мэдсэн үү? Дэлгэрэнгүйг цахим товхимлоосоо уншаарай 😇

👩‍⚕️ Бүх үндсэн ажилтан эрүүл мэндийн даатгалтай боллоо

Энэ оноос эхлэн нийт үндсэн ажилтуудыг жилийн ₮10 саяын нөхөн төлбөр бүхий Эрүүл мэндийн даатгалд хамруулахаар болсон. Энэ хүрээнд “МИГ Даатгал” ХХК-тай байгуулсан гэрээ 2-р сарын 1-нээс хэрэгжиж эхэллээ.

Ингэснээр та бүхэн хувийн болон улсын магадлан итгэмжлэгдсэн аль ч эмнэлгээр үйлчлүүлсэн төлбөрөө буцаан авах боломжтой болж байгаа юм. Түүнчлэн дараах эмнэлгүүдээр үйлчлүүлсэн тохиолдолд “МИГ Даатгал” ХХК-аас төлбөрийн баталгаа гаргуулан шууд үйлчилгээ авч болох юм байна.

Хэрэв та хоёрдугаар сарын 1-нээс хойш буюу гэрээ байгуулагдсаны дараа эрүүл мэндийн үзлэг, оношлогоо хийлгэсэн бол шаардлагатай материалуудаа бүрдүүлэн төлбөрөө буцаан авах боломжтой шүү. Дараах хүснэгтээс эмчилгээ, үйлчилгээний үнийн дүнгийн хязгаарыг хараарай.

🧑‍⚕️ “МИГ Даатгал” ХХК-ийн мэргэжилтнүүд Эрүүл мэндийн даатгалын танилцуулга хийлээ

Компанийн зүгээс нийт ажилтнуудыг Эрүүл мэндийн даатгалд хамруулсантай холбогдуулан 2-р сарын 14-ний өдөр “МИГ Даатгал” ХХК-ийн мэргэжилтнүүд Төв оффисын ажилтнуудад даатгалын нөхцөлтэй холбоотой мэдвэл зохих зүйлсийг тайлбарлан танилцуулга хийлээ. Цаашид үйлдвэр, уурхайн ажилтнуудад шат дараатай мэдээлэл өгөх бөгөөд өнөөдөр МАК Цемент үйлдвэрт танилцуулга хийж байна.

💻 Ажилтан бүр ERP-ийн хөгжүүлэлтийн санал гаргах боломжтой

Шинэчлэгдсэн ERP системийн модулийн алдаа болон хөгжүүлэлтийн саналаа гүйцэтгэгч компани “Manage Wall“ ХХК-ийн холбогдох хөгжүүлэгчдэд тухай бүрд нь мэдээлж, сайжруулалтад гар бие оролцоорой. Тус компани нь энэ оны 6-р сар хүртэл манай компанийн ERP программын хөгжүүлэлтийг хариуцан ажиллах юм.

🙋 Компанийн соёлд ажилтан нэг бүрийн оролцоо чухал

Захиргаа удирдлагын газраас 3 дахь жилдээ явуулсан 2023 оны Компанийн соёлын судалгаанд нийт ажилтнуудын 83.3% хамрагдсан байна.

Та бүхэн компанийн хэмжээнд хийгдэж буй судалгаанд идэвхтэй оролцсоноор тулгамдаж буй асуудлуудаа шийдвэрлүүлэх боломжтой юм. Тодруулбал, компани ажилтнуудын судалгааны үр дүнд тулгуурлан хүний нөөцийн бодлогоо тодорхойлдог төдийгүй удирдлагуудад оновчтой шийдвэр гаргах хөшүүрэг болдог байна. Тиймээс дараа дараагийн судалгаануудад идэвхтэй хамрагдаарай.

🇲🇳 Төв оффисын нэгдсэн золголт боллоо

Төв оффисын ажилтнууд XVII жарны “Хилэнт Эх” хэмээх Модон Луу жилийн шинийн дөрөвний өдөр нэгдсэн золголт зохион байгууллаа.

🤼‍♂️ НСУ: Хүчит бөхийн барилдаан зохион байгууллаа

Нарийнсухайтын уурхайн хамт олон XVII жарны “Хилэнт Эх” хэмээх Модон Луу жилийн сар шинийн баярыг тохиолдуулан хүчит бөхийн барилдаан зохион байгуулсан байна. Тус барилдаанд нийт 64 бөх зодоглон барилдсанаас

  • 🥇Түрүү бөх: П.Одонтөмөр, УХ 220тн Белаз автосамосвалын оператор, Аймгийн начин

  • 🥈Үзүүр бөх: Д.Цэрэгбаяр, САТ-777 автосамосвалын оператор, Сумын начин

  • 🥉 Шөвгөрсөн бөх: С.Эрдэнэбат, Хово автосамосвалын оператор

  • 🥉Шөвгөрсөн бөх: А.Бат-Эрдэнэ, LW-800 ачигчийн оператор нар тус тус шалгарсан байна.

Нүүрсний экспорт өссөөр байна 📈

Улсын хэмжээнд энэ оны нэгдүгээр сард нийт 6.8 сая.тн нүүрс экспортолсон байна. Энэ нь өмнөх оны мөн үеэс 46.7 хувиар өссөн үзүүлэлт юм. Экспортын хэмжээг боомт тус бүрээр задлан харвал:

Гашуун сухайт авто замын боомтоор: 3.6 сая.тн

Шивээхүрэн авто замын боомтоор: 1.8 сая.тн

Ханги авто замын боомтоор: 647 мян.тн

Замын-Үүд боомтоор авто замаар: 69 мян.тн

Төмөр замаар: 192 мян.тн

Агаарын замаар: 3 мян.тн нүүрс тус тус экспортолжээ.

Барилгын салбарын хөрөнгө оруулалт нэмэгджээ 📈

2023 онд Монгол Улсын барилгын салбарын хөрөнгө оруулалт ₮7.5 их наядад хүрчээ. Энэ нь 2022 оноос 17.1 хувиар өссөн үзүүлэлт юм. Нийт барилга угсралтын 47.7 хувь нь Улаанбаатар хотод хийгдсэн байна. Сонирхуулахад, Улаанбаатар хотод орон сууцны дундаж үнэ 2023 оны 12-р сарын байдлаар 4.02 саяд хүрээд байгаа юм.

Инфляц 5 сар дараалан буурлаа 👏

Монгол Улсын хэрэглээний үнийн индекс өнгөрсөн нэгдүгээр сард 7.3 хувьтай гарч 2021 оны долоодугаар сараас хойших доод түвшинд хүрлээ. Инфляц 2023 оны есдүгээр сараас хойш 5 сар дараалан буурч байгаа нь энэ юм.

ХБНГУ-тай стратегийн түвшинд түншилнэ 🤝

ХБНГУ-ын Ерөнхийлөгч Франк-Вальтер Штайнмайэрийн айлчлалын үеэр хоёр улсын харилцаа Стратегийн түншлэлийн түвшинд хүрлээ. Ингэснээр Герман улс манай улстай стратегийн түншлэлтэй Европын анхны улс болж байна. Энэ үеэр ХБНГУ-аас манай улсад 2025 он хүртэл ₮300 тэрбумтай тэнцэхүйц хөгжлийн санхүүжилт олгохоор болсон юм.

Вьетнам улс руу визгүй зорчино ✈️

Манай улсын иргэд ирэх 3-р сарын 7-ны өдрөөс эхлэн Вьетнам улс руу 30 хүртэлх хоногийн хугацаанд визгүй зорчихоор болсныг ГХЯ-ны Консулын газраас мэдээллээ.

Хүүхдүүдийн үнэ төлбөргүй хамрагдах үзлэг, оношилгоо 👨‍⚕️

6-17 насны хүүхдүүд урьдчилан сэргийлэх, эрт илрүүлгийн дараах үзлэг оношилгоонд үнэ төлбөргүй хамрагдана. Та бүхэн өрхийн болон орон нутгийн эрүүл мэндийн төвдөө хандан хүүхдүүдээ үзүүлээрэй.

Монгол бүтээл дэлхийд

Японы Саппоро хотод 74 дэх удаагаа зохион байгуулагдсан мөсний баярын үеэр болсон Олон улсын цасан барималчдын уралдаанд Монгол Улсын баг “Нөмөр” гэх бүтээлээрээ тэргүүн байр эзэллээ. Уг тэмцээнд 8 орны 9 баг ур чадвараа сорин өрсөлдсөн байна.

“Эйффельтэй” медаль

Энэ оны 07/16-08/11-ний хооронд Парис хотноо зохион байгуулагдах зуны олимпын наадмын бүх медальд Эйффелийн цамхагийн металл хэлтэрхийг шингээжээ. Сонирхуулахад, тус цамхагийг 1889 онд Францын хувьсгалын 100 жилийн ойд зориулан барьж байсан юм.

Түүхэн цаг хугацааг урагшлуулав

Судлаачид 2021 онд Балтын тэнгисийн ёроолоос олдсон чулуун хэрэм нь хүн төрөлхтний хамгийн эртний ан агнуурын зориулалттай байгууламж гэж үзэж байна. 1670ш чулуунаас бүрдсэн 1 км-ийн урттай уг байгууламжийг 11,000 жилийн өмнө нуур, тэнгисийн эрэг дагуу босгож, 8500 жилийн өмнө буюу сүүлчийн мөстлөгийн үед усан доор орсон гэж үзэж байгаа аж.

Лиза HBO-ийн цувралд

Blackpink хамтлагийн Лиза HBO компанийн “The White Lotus” цувралын 3-р бүлэгт дүр бүтээхээр боллоо. Түүний ямар дүр бүтээхийг олон нийтэд мэдээлээгүй байгаа боловч цувралын танилцуулгад Лиза Манобал гэх жинхэнэ нэрээрээ дурдагджээ. Тус киноны зураг авалт энэ сард Бангкок хотноо эхлэх юм байна.

АНУ-ын хамгийн олон үзэлттэй телевизийн шууд дамжуулалт болох “Super Bowl 2024”-ийн Halftime шоуны үеэр Монгол уран нугараачид алдарт дуучин Usher-ийн хамт үзүүлбэр үзүүлсэн байна. Kansas City Chiefs болон San Francisco 49 багуудын хооронд өрнөсөн Америкийн үндэсний хөлбөмбөгийн лиг NFL-ийн 58 дахь удаагийн аварга шалгаруулах тоглолтыг АНУ-д 123.4 сая хүн шууд үзсэн бөгөөд энэ нь 1969 онд АНУ-ын сансрын хөлөг саран дээр бууснаас хойших хамгийн өндөр үзэлттэй ТВ-ийн шууд дамжуулалт болжээ 👇