Makers News #53

🐉 Битүүний өдрийн мэнд

February 09, 2024

Powered by

Битүүний өдрийн мэнд!  🐉 Бид энэ долоо хоногт Модон Луу жилийн ажил үйлс, буян заяагаа даатган ном хурууллаа. Нийт МАК-чууд та бүхний ажил үйлс өөдрөг бүтэмжтэй, эрүүл энх байх болтугай 😇

🙏 Гандантэгчэнлин хийдэд ном хуруулж, буян заяагаа даатгалаа

2024 оны 02-р сарын 07-ны билэгт сайн өдөр буюу Өвлийн адаг хөхөгчин үхэр сарын есөн улаан цагаагчин үхэр өдөр компанийн зүгээс Гандантэгчэнлин хийдэд ном хуруулан, буян хишгийн даллага авхууллаа.

21 дэх жилдээ хэрэгжиж буй ном хуруулах үйл ажиллагааны үеэр Гандантэгчэнлин хийдийн шинэ хамба Д.Жавзандорж МАК-ийн ажилчдыг хүлээн авч уулзан айлдвар айлдлаа 🙏

😉 1,300 гаруй ажилтан тэтгэврийн хуримтлалаа үүсгэжээ

2024 оны 01/01-нээс хэрэгжиж эхлээд байгаа ажилтнуудыг дэмжих хөтөлбөрийн хүрээнд тэтгэврийн хуримтлалын гэрээ байгуулах ажил ид өрнөж байна. 02/07-ны байдлаар групп компанийн хэмжээнд нийт 1353 ажилтан гэрээ байгуулж, хуримтлалаа үүсгэсэн байна.

Хэрэв та гэрээгээ байгуулж амжаагүй бол харьяа газар, нэгж, үйлдвэр, уурхайн захиргааны хэсэгт хандаарай 😉

🎖️ Төрийн дээд одонгоор энгэрээ мялаалаа

Төрийн дээд шагнал “Алтан гадас” одонт эрхмүүд

МАК-ийн бахархал болсон хоёр эрхэм төрийн дээд шагнал "Алтан гадас" одонгоор энгэрээ мялаалаа.

Хөдөлмөр, бүтээлээ өндрөөр үнэлүүлж шагнал хүртсэн Худалдаа эрхэлсэн дэд ерөнхийлөгч Д.Далайбаяр, Хөдөө аж ахуйн төслийн эрхлэгч Х.Алтангэрэл нартаа халуун баяр хүргэе 👏

🐫 “Ботгонд Бонус” хөтөлбөр 11 дэх жилдээ

Энэ жил 4026 ботгонд 80.5 сая төгрөгийн урамшуулал олголоо

“Монголын Алт” МАК компанийн нийгмийн хариуцлагын хүрээнд 2013 оноос хойш хэрэгжүүлж буй хөтөлбөрийн 2024 оны үйл ажиллагаа амжилттай зохион байгуулагдлаа. Энэ жилийн тухайд Өмнөговь аймгийн Гурвантэс, Дорноговь аймгийн Мандах, Даланжаргалан, Дундговь аймгийн Баянжаргалан, Дэлгэрхангай сумдад 4026 ботго бойжуулсан 508 өрхийн малчдад нийт 80.5 сая төгрөгийн урамшуулал олгосон юм.

Харин уг хөтөлбөр анх хэрэгжиж эхэлснээс хойш МАК компани нийт 30,525 ботгонд урамшуулал олгосон бөгөөд хөтөлбөрийн хүрээнд нийт 628 сая төгрөгийг малчдад олгоод байна.

 🐫 Гурвантэс сумын малчид урамшууллаа гардан авлаа

Өмнөговь аймгийн Гурвантэс сумын малчдад урамшуулал гардуулах үйл ажиллагааг 02/07-нд зохион байгуулсан бөгөөд энэ жил нийт 845 ботгонд 8.4 сая төгрөгийн урамшуулал олгож, 525 ахмад настанд сар шинийн гарын бэлэг гардуулж, хүчит бөхийн барилдааныг ивээн тэтгэлээ 😊

 🐫 Дэлгэрхангай сумын малчид урамшууллаа гардан авлаа

Дундговь аймгийн Дэлгэрхангай сумын малчид 19.3 сая төгрөгийн урамшуулал гардан авлаа. Мөн сар шинийн баярын босгон дээр тус сумын 282 ахмад настанд хүндэтгэл үзүүлж, гарын бэлэг гардууллаа 😇

 ✅ МАК Евро Венти дугариг хоолой үйлдвэрлэж эхэллээ

МАК Евро Венти үйлдвэр дэлхийд тэргүүлэгч Spiro брэндийн тоног төхөөрөмжөөр өргөтгөл хийж, туршилтаа амжилттай явуулан дугариг хоолой үйлдвэрлэж эхэллээ.

Үйлдвэрийн өргөтгөл хийхэд Spiro International компанийн Инженер Jonas Hjalmarsson, Robin Akesson нар МАК Евро Венти үйлдвэрт ажиллаж, угсралт, суурилуулалт хийн манай ажилтнуудад чиглүүлэх дадлага, сургалт орсон байна.

 👏 Монгол Улсын шилдэг ААН-үүдийн туг өргөх ёслолд оролцлоо

МҮХАҮТ 2023 оны шилдэг компаниудын тугийг гадна талбайдаа мандууллаа. Туг өргөх ёслолд МАК-ийн Бизнес хөгжил эрхэлсэн дэд ерөнхийлөгч П.Тэмүүлэн оролцож компанийнхаа тугийг мандуулсан юм 🙌

Бидний хувьд 2023 онд Шохойн үйлдвэр, Бетон зуурмагийн үйлдвэр, Хуванцар поддоны үйлдвэр зэрэг 3 шинэ үйлдвэр ашиглалтад оруулж, 1.6МВт хүчин чадал бүхий нарны цахилгаан станцын угсралтын ажлыг гүйцэтгэж аж үйлдвэрлэлийн салбарыг түүчээлж ажилласан тул МҮХАҮТ-ын 2023 оны шилдэг компаниар тодорч Мөнгөн Меркуригийн эзэн болсон юм.

Монгол Улсын зээлжих зэрэглэлийг “тогтвортой“ гэж үзлээ 🇲🇳

Fitch Ratings байгууллага Монгол Улсын урт хугацааны зээлжих зэрэглэлийн “В“ төлөвийг тогтвортой хэвээр үлдээлээ. Манай улсын дунд хугацааны өсөлтийн төлөв, нэг хүнд ногдох орлогын хэмжээ ижил зэрэглэлийн бусад орнуудтай харьцуулахад сайн ч гадаад санхүүжилт болон түүхий эдийн экспортоос хэт хараат байдал нь гол хязгаарлагч хүчин зүйл гэж үзсэн байна.

Гадаад худалдааны тэнцэл $388.9 саяын ашигтай гарлаа 💵

Гадаад худалдааны нийт бараа эргэлт 1-р сард 2.3 тэрбум ам.доллар болж, 2023 оны мөн үеэс 495.2 сая ам.доллар буюу 28 хувиар өссөн байна. Экспортын дүн импортынхоос 388.9 сая ам.доллароор давж, гадаад худалдааны тэнцэл эерэг гарлаа. Тайлант хугацаанд экспортолсон барааны нийт үнийн дүнгийн 88 хувийг эрдэс бүтээгдэхүүн бүрдүүлжээ.

Оюу толгойн өсөлт 📈

Зэс, алтны үнэ өндөр байж, борлуулалт нь нэмэгдсэний нөлөөгөөр өнгөрсөн онд Оюу Толгойн борлуулалтын орлого 9% өсөж, ₮5.6 их наядад хүрчээ. Тайлант хугацаанд тус компани 168 мян.тн баяжмал дахь зэс, 177.3 мянган унц баяжмал дахь алт үйлдвэрлэсэн байна.

Apple Pay үйлчилгээ Монголд нэвтэрнэ 📲

Энэ оны 6-р сард багтан Apple Pay төлбөрийн системийг Монголд нэвтрүүлэхээр боллоо. Ингэхдээ “Apple Pay”-тай хосолсон Visa картын үйлчилгээг нэвтрүүлэхээр зорьж буй аж. “Apple Pay” нь 2014 онд танилцуулагдсан цагаасаа эхлэн iPhone хэрэглэгч 800 сая гаруй хэрэглэгчид үйлчилж буй цахим төлбөр тооцооны систем билээ.

Монгол хэл бичгийн шалгалтын бүртгэл 02/15-нд эхэлнэ 📚

Дээд боловсролын сургалтын байгууллагад элсэн суралцагчдын сурах ерөнхий чадвар, мэдлэгийн түвшин тогтоох элсэлтийн шалгалт, эх хэлний боловсролын чанар, хэрэглээ, иргэдийн харилцааны соёл, эх хэлний дархлааны түвшин тогтоох Монгол хэл бичгийн шалгалтын бүртгэл 02-р сарын 15-наас эхлэх юм байна. Шалгалтыг 04-р сарын 06-ны өдөр 10:00-11:40 цагт зохион байгуулахаар товложээ.

Монголын бахархал Европт

Уран нугараач Э.Лхагва-Очир Альпийн нурууны 2317 метр өндөрт нугарч Европчуудыг алмайруулсан байна. Тэрбээр өмнө нь мөсөн тайзнаа 8 метрийн өндөр сандалнууд дээр нугарах үзүүлбэрийг орлон тоглогчгүйгээр 3 жилийн турш тоглож байсан билээ.

Монгол дахь нээлтийн тов

Starlink Монгол дахь үйлчилгээний албан ёсны нээлтээ 02/26-нд Испанийн Барселона хотод хийхээр боллоо. Тус компани АНУ, Канад, Их Британи, Герман зэрэг 50 гаруй улсад үйлчилгээгээ нэвтрүүлж, 4,000 гаруй хиймэл дагуул хөөргөн, дэлхийг хамарсан хиймэл дагуулын сүлжээг үүсгэжээ.

95-тай төгсөгч

Их Британийн иргэн өдгөө 95 настай Дэвид Маржот философийн чиглэлээр магистрын зэрэг хамгаалжээ. Тэрээр сэтгэцийн эмч мэргэжилтэй бөгөөд цаашид докторын зэрэг хамгаалахаар зорьж байгаа юм байна. Хэрвээ тэр докторын зэрэг хамгаалахаар сурвал 102 настайдаа төгсөх юм.

“Тагнуул” тагтааг суллав

Энэтхэгийн эрх баригчид амьтны эрхийг хамгаалагчдын шахалтаар Хятадын тагнуул гэж үзэн 8 сарын турш хорьж байсан тагтааг суллажээ. Уг тагтааг өнгөрсөн оны тавдугаар сард далавч дээр нь хятад ханзаар үг бичсэн гэх шалтгаанаар тагнуул байж болзошгүй гэж үзэн хориод байв.

Дэлхийд алдартай “Mortal Kombat 1 - Rules of Outworld” тоглоомын Синделийн дүрд Д.Дарь гэх Монгол модель бүсгүй тоглосон байна. Тодруулбал, түүний бүтээсэн дүр нь Эдениагийн хатан бөгөөд тус тоглоомын гол дүрийн нэг болох Китана гүнжийн ээж юм байна.