Makers News #48

☀️ НСУ: Нарны цахилгаан станцтай болно

January 05, 2024

Powered by

Шинэ оны мэнд! Та бүхэнд 2024 оны эхний дугаар хүрч байна. Он гарсаар улсын хэмжээнд хэрэгжиж эхэлсэн хуулиуд болон компанийн хэмжээнд хэрэгжиж буй шинэ дүрэм, журмын талаарх чухал мэдээллүүдийг энд нэгтгэлээ.😉

💁‍♀️ ТАНИЛЦ: 2024 онд компанийн хэмжээнд мөрдөх цалин, урамшууллын шинэ журам

Энэ оны нэгдүгээр сарын нэгнээс эхлэн компанийн хэмжээнд хэрэгжиж эхлээд буй цалин урамшууллын шинэ дүрэм, журмыг танилцуулж байна. Компанийн зүгээс ажилтнуудын эрүүл мэнд, ирээдүйд хөрөнгө оруулах ач холбогдол бүхий урамшуулал эдлэх боломжийг үндсэн ажилтан бүрд олгож байгаа юм. 👏

☀️ НСУ: Бага оврын нарны цахилгаан станцтай болно

Нарийнсухайтын уурхай 20кВт-ын суурилагдсан хүчин чадал бүхий Ongrid системийн бага оврын нарны станцаа нэгдүгээр сарын 15-ны өдөр ашиглалтад оруулахаар төлөвлөн ажиллаж байна. Эхний ээлжид ашиглалтад орж буй станц нь жилд 46,333кВт/цаг эрчим хүч үйлдвэрлэж, ₮17.8 саяын хэмнэлт бий болгох ба хүлэмжийн хийн ялгаруулалтыг 60,232кг-аар бууруулах юм. Цаашид нарны цахилгаан станцын хүчин чадлыг 500кВт хүртэл нэмэгдүүлэх төлөвлөгөөтэй байгаа юм байна.

🌎 МАК 2023 онд байгаль орчны үйл ажиллагаанд тэрбум гаруй төгрөгийн хөрөнгө оруулалт хийжээ

Өнгөрсөн онд байгаль орчин руу чиглэсэн үйл ажиллагааны хүрээнд нийт ₮1,077,543,757 зарцуулжээ. Хөрөнгө оруулалтын дүнг задлан харвал 74%-ийг нь хуулийн нийцэл хангах хүрээнд буюу орчны хяналт шинжилгээний хөтөлбөр, хог хаягдлаа гэрээний дагуу тээвэрлүүлэх, археологи, палентологи, угсаатны зүйн судалгаа хийлгэх, газрын төлөв байдал, чанарын хянан баталгаа хийлгэх зэрэг ажилд зарцуулжээ.

Тэрчлэн, бохир ус цэвэршүүлэн дахин ашиглах байгууламж суурилуулах, цахилгаан автобус худалдан авах зэрэг техник технологио сайжруулахад мөн хэмжээний хөрөнгө оруулалт хийсэн байна.

Үүнээс гадна 2023 онд 10 сэдвийн хүрээнд 9648 хүнд 228 удаагийн сургалт орж, 157 га газарт нөхөн сэргээлт хийжээ. Мөн нийт 21,575тн хог хаягдал гарснаас 97тн-г нь дахин ашиглаж, үйлдвэр уурхайн хэмжээнд нийт 16,192 мод, бут тарьж ургуулаад байна.

Мөн бид 2023 онд зөвшөөрөгдсөн хэмжээнээс 2,8 дахин бага ус ашигласан байна. Бид чандмань эрдэнэ болсон усаа хэмнэн, үйлдвэрлэлдээ технологийн усыг дахин ашиглаж, байгаль дэлхийд ээлтэй үйлдвэрлэл эрхэлж байна.

🌎 Киоск машин болон “Хялбар апп” түр хугацаанд ажиллахгүй

ERP системийн шинэчлэл хийгдэж байгаатай холбоотойгоор Киоск машин болон Хялбар апп түр хугацаанд ажиллахгүй боллоо. Тиймээс та бүхэн энэ хугацаанд ажлын газрын тодорхойлолт болон ЭСЯ-ны тодорхойлолтыг ЗУГ-ын Гадаад ажилагсдын шилжилт хөдөлгөөн хариуцсан мэргэжилтэн А.Өлзийнямаас, цалингийн тодорхойлолтыг СБГ-ын Нягтлан бодогч Г.Гэрэлтуяагаас авна уу.

МАК үүсгэн байгуулагдсан цагаасаа хойш нийт 178,940 ширхэг мод, бут тарьж ургуулаад байна. 🌳

2024 оны 1-р сарын 1-ээс хэрэгжиж эхэлсэн хуулиуд ⚖️

Хөдөлмөрийн хөлсний доод хэмжээ ₮660,000 боллоо

Малчдын НДШ-ийн 50%-ийг төрөөс төлнө

НДШ нэрийн дансанд хуримтлагддаг болно

Хувиараа хөдөлмөр эрхлэгч 1%-ийн ХХОАТ төлнө

Тэтгэвэр өвлөгддөг болно

Монгол Улсын гадаад валютын нөөц түүхэн дээд түвшинд хүрлээ 💰

Сангийн яам болон Эдийн засаг хөгжлийн яамны мэдээлж байгаагаар гадаад валютын нөөц 4 тэрбум 918 сая ам.доллар болж өсжээ. Энэ нь манай улсын түүхэн дээд үзүүлэлт юм.

Doriemus компани Монголд хайгуул хийнэ 🔎

Их Британид төвтэй, Австралийн Хөрөнгийн биржид бүртгэлтэй газрын тосны хайгуулын чиглэлээр үйл ажиллагаа явуулдаг “Doriemus“ компани Монголд уул уурхайн бүтээгдэхүүний хайгуул хийж буй “Asian Battery Minerals“ компанийг 100% эзэмшихээр төлөвлөжээ. Ингэснээр тус компани манай улсад никель, лити, графитын хайгуул хийх аж.

Ашигт малтмалын олборлолтоор БНХАУ тэргүүлж байна 💁

Эдийн засгаа ногооруулахад нэн чухал ашигт малтмалын олборлолт, боловсруулалтаар БНХАУ дэлхийд тэргүүлж байна. Тухайлбал 2022 онд дэлхийн газрын ховор элементийн нийт олборлолтын 70 гаруй хувийг манай өмнөд хөрш дангаараа бүрдүүлж байжээ.

Өвлийн улирал богиносож байна ❄️

Ус, цаг, уур, орчны шинжилгээний хүрээлэнгийн судлаачид Монгол Алтайн нуруу орчмын экосистемийг судалж, 1990-2021 онд өвлийн улирлын үргэлжлэх хугацаа 12 хоногоор богиноссон гэж мэдээллээ. Тодруулбал, тухайн бүс нутгийн агаарын дундаж температур 1940-2021 оны хооронд өвлийн улиралд 1100-1700 метрийн өндөрт 3-4 градусаар эрчимтэй дулаарсан аж.

Нарны судалгаа нэг шат ахина

NASA-аас 2018 онд нарыг судлахаар хөөргөсөн Parker Solar Probe хөлөг энэ онд нарны хажуугаар 700,064 км/ц-н хурдтай нисэн өнгөрөх гэж байна. Төслийн багийнхан үүнийг наран дээр буухтай адил хэмээн тодотгож байна.

Энэтхэгчүүд хар нүхийг судална

Энэтхэгчүүд хар нүхийг судлах зорилготой “XpoSat“ гэх хиймэл дагуулаа энэ сарын 1-ний өдөр амжилттай хөөргөлөө. $30 саяын өртгөөр бүтсэн энэхүү хиймэл дагуул нь ойролцоогоор 5 жилийн хугацаанд ажиллах юм байна.

Дэлхийн хамгийн баян эмэгтэй

“L’Oreal” компанийн өв залгамжлагч өдгөө 70 настай Франсуа Беттанкурт Майерс $100 тэрбумын хөрөнгөтэй хамгийн анхны эмэгтэй боллоо. Bloomberg-ийн тэрбумтнуудын индекс түүнийг дэлхийн 12 дахь чинээлэг хүнээр нэрлэсэн байна.

Хамгийн олон сонгуультай жил

Энэ онд дэлхийн 60 гаруй улсад чөлөөт ардчилсан сонгууль зохион байгуулагдана. Дахин ийм олон сонгууль давхацсан жил 2048 оноос өмнө тохиохгүйг АНУ-ын Integrity Institute стратегийн судалгааны төв мэдээлжээ.

Энэ оны долоодугаар сарын 24-нд нээлтээ хийх "Captain America: Brave New World" кинонд шинэхэн ахмад Сэм Вилсоны талаар өгүүлэх болно. Мөн жүжигчин Себастъяан Стэн Баки Барнсын дүрээр эргэн ирнэ гэсэн цуурхал гараад байгаа юм.