Makers News #47

"Golden Night"-ийн эргэн тойронд

December 28, 2023

Powered by

Өдрийн мэнд! Товхимлын энэ оны сүүлийн буюу 47 дахь дугаар та бүхэнд хүрч байна. Бид 2023 онд амжилт бүтээлээр арвин байж, байгууллагынхаа 30 жилийн тэгш ойг өргөн дэлгэр тэмдэглэн өнгөрүүллээ. Ирэх ондоо эрүүл энх байж, илүү ихийг хийж бүтээгээрэй.😉

🎖️ Төрийн дээд одон, медалийн эзэд шагналаа гардлаа

МАК-ийн 3 эрхэм Монгол Улсын Ерөнхийлөгч У.Хүрэлсүхээс төрийн дээд одон медалиа гардан авлаа. Тодруулбал, Тэргүүн дэд ерөнхийлөгч Г.Цогт Монгол Улсын Хөдөлмөрийн баатар, Барилгын материалын үйлдвэрлэл эрхэлсэн Дэд ерөнхийлөгч Б.Баттулга Хөдөлмөрийн гавьяаны улаан тугийн одон, Санхүү, бүртгэлийн газрын захирал Д.Сайнжаргал Монгол Улсын Гавьяат эдийн засагч цол тэмдгээр тус тус энгэрээ мялаалаа. Нийт МАК-чуудынхаа өмнөөс халуун баяр хүргэе 👏👏👏

🌟 “Golden Night”-ийн эргэн тойронд

Байгууллагын 30 жилийн ойн сүүлийн тэмдэглэлт арга хэмжээ болох “Golden Night” шинэ жилийн баярын цэнгүүн боллоо. Энэ үеэр компанийнхаа оны шилдгүүдийг шалгаруулахын зэрэгцээ төрийн дээд одон, медалиар энгэрээ мялаасан эрхмүүдэд шагнал гардуулсан юм. Тодруулбал, төрийн дээд Алтан гадас одонгоор 8 ажилтан, Хөдөлмөрийн гавьяаны улаан тугийн одонгоор 2 ажилтан, Хөдөлмөрийн хүндэт медалиар 19 ажилтан тус тус энгэрээ мялаасан юм.

Мөн УУХҮЯ-аас 5 ажилтан Тэргүүний геологич, 2 ажилтан жуух бичгээр тус тус шагнагдлаа. Харин БХБЯ-аас 2 ажилтныг Тэргүүний барилгачин цол тэмдгээр шагнаж, 3 ажилтанд Хүндэт жуух бичиг гардуулсан юм. Түүнчлэн 1 ажилтан ХНХЯ-ны Хүндэт жуух бичиг гардан авч, мөн 1 ажилтан БОАЖЯ-ны Тэргүүний ажилтан цол тэмдгээр шагнууллаа.

МАК-ийн оны шилдгүүдийг танилцуулъя.

Бодлогын зөвлөлийн даргын нэрэмжит шагнал: Э.Төгөлдөр захиралтай Маркетингийн газрын хамт олон

Барилга, төсөл эрхэлсэн дэд ерөнхийлөгч Д.Хулангийн нэрэмжит шагнал: Х.Уранзаяа, БТГ-ын ИТА-ны дарга

Ерөнхийлөгчийн нэрэмжит шагнал: Ж.Бадамханд захиралтай ДАЧХХАБГ-ын хамт олон, Ш.Дэлгэрбаатар захиралтай МТГ-ын хамт олон, Г.Ганчулуун ахлагчтай Дотоод PR & Арга хэмжээ зохион байгуулах ажлын дэд хэсэг

Оны шилдэг 9 ажилтан

Оны шилдэг 9 оператор

Оны шилдэг 9 залуу ажилтан

Оны шилдэг тамирчин

Г.Буянтөгс, “МАК Цемент” ХХК-ийн Хөдөлгөөн засалч

Ж.Билгүүдэй, Нарийнсухайтын уурхайн Sandvik-75 өрмийн туслах

Оны шилдэг Эрдэм, шинжилгээний бүтээл: Г.Дашдулам, “МАК Цемент” ХХК-ийн Лабораторийн эрхлэгч

Оны спортын шилдэг хамт олон: Д.Ганбат даргатай “МАК Цемент” ХХК-ийн хамт олон

🏆 Инновацын уралдааны шилдгүүд тодорлоо

Компанийн ерөнхийлөгчийн санаачилгаар зохион байгуулсан “МАК Инновац” уралдааны шилдэг багууд тодорлоо. Уралдаанд нийт 37 баг төслөө танилцуулан өрсөлдсөн бөгөөд 3 шатны шалгаруулалтыг дараах 6 баг давсан юм.

  • I байрт: Нарийнсухайтын уурхай, “Говийн Оюу” баг 

  • II байрт: Трү Ти Ар Си ХХК, “G-Force” баг 

  • III байрт: "МАК Цемент" ХХК, “МАК Цемент Технологи” 1-р баг

  • IV байрт: "МАК Цемент" ХХК, “Гөлтгөнө” баг

  • V байрт: Нарийнсухайтын уурхай, “Нарийнсухайтын уурхай Электрон” баг

  • VI байрт: "МАК Цемент" ХХК, “МАК Цемент Технологи” 2-р баг 

🎁 НСУ: Лабораторийн хэсгийн ажилтнууд өөрсдийн гараар бэлэг бэлджээ

Нарийнсухайтын уурхайн лабораторийн хамт олон компанийн 30 жил, Нарийнсухайтын уурхайн 15 жилийн ойг тохиолдуулан уурхайн нийт хамт олондоо зориулан өөрсдийн гараар 100% эко бүтээгдэхүүн хийж бэлэглэжээ. Ингэхдээ зоогийн газраас гарсан өөх, тосны хаягдлыг ашиглан эдийн саван, кофе шопоос гарсан кофены шаарыг ашиглан биеийн гуужуулагч хийсэн байна. Мөн гар ариутгагч, гарын саван, ванны бөмбөлөг, анхилам лаа тус бэлэгт багтсан байв. Сонирхуулахад эдгээр бэлгийг бүтэн жилийн турш сэтгэлээ шингээн урлажээ.

📷 МАК-ийн 30 жил Unread-ийн дуранд

Салбар салбарын төлөөлөл болсон залуусын дуу хоолой, өнгө төрхийг нийгэмд хүргэдэг Unread Media вебсайт МАК компанийн өнгөрсөн хугацаанд бүтээн байгуулж, бий болгосон үнэ цэн, одоогийн ололт амжилт, ирээдүйн төлөвлөгөөний талаар “А-Я” буландаа онцоллоо.

Үүнээс гадна, “10 ертөнц, 10 өнцөг” буланд манай компанийн 10 ажилтан мөн оролцсон байгаа. Өнөөдөр нийтлэгдэх энэхүү нийтлэлийг та бүхэн сонирхон уншаарай 😇

МАК үүсгэн байгуулагдсан цагаасаа хойш 144 ажилтанд ашиглах болон өмчлөх хэлбэрээр байр бэлэглэсэн.

$200 саяын гадаад өрөө дарлаа 💰

Монгол Улс “Самурай” бондын 200 сая ам.долларын өрийг өөрийн эх үүсвэрээр бүрэн төлж барагдууллаа. Засгийн Газар 2012 оноос хойш 12 бонд гаргасан бөгөөд энэ оны III улирлын байдлаар Монгол Улсын нийт гадаад өр 34 тэрбум ам.доллароор хэмжигдэж байна.

Гашуунсухайт-Ганцмод чиглэлийн төмөр замын ТЭЗҮ дэмжигдлээ 🚉

ЗТХЯ-ны Шинжлэх ухаан, технологийн зөвлөлийн хурлаар Гашуунсухайт-Ганцмод чиглэлийн хил дамнасан төмөр замын ТЭЗҮ-ийг хэлэлцэж, дэмжлээ. Энэ замаар жилд 30 сая.тн ачаа тээвэрлэх боломжтой ба 1 дүгээр зэрэглэлийн хос болон дан замтай, гүүрний нийт урт нь 9.1 км байхаар төлөвлөгджээ.

Эмнэлгүүдийн баярын амралтаар ажиллах хуваарь 👩‍⚕️

Баярын амралтаар буюу 12-р сарын 29-31, 1-р сарын 1-ний өдрүүдэд дүүрэг, өрхийн эмнэлгүүд дараах хуваарийн дагуу ажиллана. Өрхийн эрүүл мэндийн төвүүд 10-16 цаг хүртэл, Дүүргийн эрүүл мэндийн төвийн гэмтэл, мэс засал, шүд, хүүхдийн кабинетууд 10-15 цаг хүртэл, Нийслэлийн шүд, эрүү, нүүрний төв 9-15 цаг хүртэл /2023.12.29,31-ний өдөр/ Нийслэлийн түргэн тусламжийн төвийн үйл ажиллагаа 24 цагаар хэвийн үргэлжилнэ. 

Ирэх оноос хэрэгжиж эхлэх замын хөдөлгөөний тухай хууль 👮

Ирэх оны 1-р сарын 1-нээс эхлэн жолооч нарын хариуцлагыг чангатгах зорилгоор торгуулиа хуульд заасан 15 хоногийн дотор төлөөгүй бол торгуулийн хэмжээг 50 хүртэлх хувиар нэмэх, дараагийн шатанд тээврийн хэрэгслийн замын хөдөлгөөнд оролцох эрхийг хязгаарлах, бүр төлөхгүй бол нийтэд тустай ажил хийлгэх замаар хариуцлага хүлээлгэх хууль хэрэгжиж эхлэх юм байна.

Түлшний хомсдол арилна 🚗

Нийт хэрэглээнээс 25,000тн түлш илүү захиалсан тул шатахууны хомсдол арилна гэж салбарын яам мэдээллээ. Мөн түлшний үнэ өсөхгүй бөгөөд ОХУ-аас дизель түлшийг $855-аар нийлүүлж байсан бол ирэх сараас $805 болох ба БНХАУ-аас Евро-5 шатахууныг $1080-аар нийлүүлж байсан бол $1030-аар нийлүүлэхээр үнийн санал өгсөн гэлээ.

Дэлхийн бүх иргэнд визгүй орон

Кени улс ирэх оноос эхлэн дэлхийн бүх улс орны иргэдийг визгүй хүлээн авахаар боллоо. Жуулчид ирэхээсээ өмнө тус улсын засгийн газрын хөгжүүлсэн платформд хандан аяллын зөвшөөрөл авахад л болох юм байна.

Гэртээ 555 сүлд мод засжээ

Герман улсын Ринтелн тосгонд оршин суудаг Сюзана болон Томас Жеромин нар гэртээ 555 сүлд мод засжээ. Германы дээд амжилт бүртгэдэг хүрээлэнгийн мэдээлснээр тэд нэг гэрт хамгийн олон баярын гацуур зассан рекордыг шинэчилжээ.

Муур ба шизофрени

Австралийн эрдэмтэд 1980-2023 оны хооронд хийгдсэн муур тэжээх болон шизофренитэй төстэй хамаарлыг судалсан эрдэм шинжилгээний ажлуудад мета анализ хийжээ. Улмаар бага наснаасаа муур тэжээх нь шизофренитэй төстэй эмгэг тусах эрсдэл нэмэгддэг гэсэн үр дүн гарсан байна. Эрдэмтэд үүний шалтгааныг муурт байдаг Toxoplasma Gondii гэх шимэгчтэй холбоотой гэж тайлбарлажээ.

Женни компани байгууллаа

Blackpink хамтлагийн гишүүн Женни “OddAtelier“ гэх өөрийн компанийг байгуулсан тухайгаа өөрийн цахим хуудсаар дамжуулан мэдэгдлээ. Тэрээр ганцаарчилсан уран бүтээлээ өөрийн компаниар дамжуулан хийхээр болсноо зарласнаар хувь уран бүтээлчийн хувьд YG-д харьяалагдахгүй болсон нь тодорхой боллоо.

Дэлхий нийтийг байлдан дагуулсан Кунг Фу Панда анимэйшний 4-р ангийн трэйлер цацагдлаа. Уг кино дэлхий дахинаа 2024 оны 3-р сарын 8-нд нээлтээ хийх товоо зарлаад байгаа юм.