- Makers News
- Posts
- Makers News #39
Powered by
Шинэ сарын эхний Баасан гарагийн мэнд! 😁 Ажлын сүүлийн өдөр ээлжит спортын тэмцээнүүддээ идэвхтэй оролцож, долоо хоногоо эрч хүчтэй өндөрлүүлцгээе. 💪
🛤️ Шивээхүрэн Терминал төслөөр “Тээврийн 7 хоног”-т оролцоно
“Бүсийн тээвэр, логистикийн холболтыг бэхжүүлэх нь сэдэвт “Тээврийн долоо хоног 2023” олон улсын форум 11-р сарын 6-10-ны өдрүүдэд Улаанбаатар хотноо болно. Энэхүү арга хэмжээнд Шивээхүрэн Терминалын бүтээн байгуулалтын төслөөр МАК компани оролцох гэж байна.
Хэлэлцэх асуудлууд:
Бүсийн хэмжээнд тээвэр, логистикийн салбарын эдийн засгийн хамтын ажиллагааны үр өгөөжийг нэмэгдүүлэх
Хил дамнасан тээврийг хөнгөвчлөх, тээврийн салбарт харилцан уялдаатай холболтыг бий болгох
Гааль, тариф, хилийн горим журам, баримт бичиг, дата мэдээллүүдийн нийцлийг сайжруулах
Тээврийн коридоруудыг хөгжүүлэх, салбарын тулгамдаж буй бусад асуудлуудыг хамтран шийдвэрлэх чиглэлээр хэлэлцэнэ.
Шивээхүрэн чингэлэгт тээврийн терминал нь 5G сүлжээний орчинд ажиллах бөгөөд соронзон мэдрэгчтэй зам бүхий AGV дэвшилтэт технологид суурилсан ухаалаг гарцын системтэй. Орчин үеийн цогц бүтээн байгуулалт ашиглалтад орсноор нүүрсний хорогдол, бохирдол багасаж, байгаль орчинд үүсэх сөрөг нөлөөлөл буурч, Монгол Улсын нүүрсний экспортын хэмжээ нэмэгдэж, цаашид Шивээхүрэн боомтын нэвтрүүлэх хүчин чадал жилд 40-60 сая тоннд хүрэх боломж бүрдэх юм.
🍽️ Дэнжийн элсний уурхайн зоогийн газар ашиглалтад орлоо
Дэнжийн элсний уурхайн уулын хэсгийн зоогийн газар нь нэг дор 36-48 хүн хүлээн авах боломжтой, цэвэр усны гүний худаг, нөөц танк, халаалт, хөргөлтийн систем, бохир усны танк бүхий иж бүрэн төлөвлөлттэй. Мөн ажилчдын /эрэгтэй, эмэгтэй/ хувцас солих өрөө, душ, ариун цэврийн өрөө бүхий энэхүү цогц бүтээн байгуулалтыг 10-р сард ашиглалтад оруулаад байна 🤩
🏥 Төв оффисын дэргэд эрүүл мэндийн нэгж байгуулагдлаа
ЗУГ-ын дэргэд шинээр байгуулагдсан Эрүүл мэндийн нэгж дараах чиглэлээр үйл ажиллагаа явуулах юм байна.
Эрүүл мэндийн яаралтай тусламж - Бүх осол гэмтэл, хордлого, халдварт өвчний үед үзүүлэх яаралтай тусламж
Урьдчилан сэргийлэх сургалт - Мэргэжлийн өвчлөл болон халдварт өвчнөөс урьдчилан сэргийлэх
Ажилчдын эрүүл мэндийн түвшний судалгаа - Мэргэжлээс шалтгаалах өвчлөл, суурь өвчлөл, өдөр тутмын үзлэг
Орчны эрүүл мэнд - Орчны эрүүл ахуй, хүнсний эрүүл ахуй, усны эрүүл ахуй, ажлын байрны эрүүл ахуй
ЭЭХЗ татан авах, түгээх - Зайлшгүй шаардлагатай эмийн жагсаалт болон амин чухал эмийн жагсаалтын дагуу захиалга хийх
⚽ Хөлбөмбөгийн клубийн цугларалт
Төв оффисын хөлбөмбөгийн клубээс санаачлан баг, хамт олноороо чөлөөт цагаа зөв боловсон өнгөрүүлэх зорилгоор Төв аймагт байрлах Монголын хөлбөмбөгийн холбооны Airdom-ийг түрээслэн тоглолоо.
🧠 30 жилийн ойн АХА тэмцээн
Байгууллагын 30 жилийн ойг тохиолдуулан хамт олноороо оролцсон телевизийн хөгжөөнт, цэнгээнт АХА нэвтрүүлгийг бүрэн эхээр нь хүлээн авч үзнэ үү 😊
Компаниа төлөөлөн амжилттай оролцсон нийт ажилтнууддаа баярлалаа 😇
♟️🎯 Шатар, даам, дартсын тэмцээн болно
Компанийн 30 жилийн ойг угтсан спортын ээлжит тэмцээн шатар, даамны төрлөөр зохион байгуулагдах гэж байна. 14:00 цагаас эхлэх энэхүү тэмцээнд та бүхэн баг хамт олноо уухайлан дэмжээрэй. ♟️
Шатар - Эрэгтэй /25 тамирчин/
Шатар - Эмэгтэй /12 тамирчин/
Даам - Эрэгтэй /18 тамирчин/
Даам - Эмэгтэй /15 тамирчин/ тус тус өрсөлдөнө.
Харин маргааш буюу 2023/11/04-ний Бямба гарагийн 09:00 цагт Үндэсний Соёл Амралтын Хүрээлэнгийн Никитон клубийн баруун талын “Хоолондоо ресторан”-д Дартсын тэмцээн зохион байгуулагдана. Дартсын тэмцээний багийн төрөлд 20 баг, Эрэгтэйчүүдийн ганцаарчилсан төрөлд 22, Эмэгтэйчүүдийн ганцаарчилсан төрөлд 18 тамирчин тус тус өрсөлдөнө. 🎯
Нарийнсухайтын уурхайн нүүрсний экспорт 2018 онд 7 сая тонн давсан нь компанийн түүхэн рекорд үзүүлэлт юм 📈
БНХАУ-ын нүүрсний импорт энэ онд түүхэн дээд цэгтээ хүрнэ 🇨🇳
2021 оны эрчим хүчний хямралыг дахин давтахгүйн тулд БНХАУ энэ онд нүүрсний олборлолтоо дахин рекорд дээд түвшинд хүргэж, мөн 9-р сарын байдлаар нүүрсний импортоо өмнөх оны мөн үеэс 73 хувиар өсгөөд байна. Халаалтын улирал ойртож буй энэ үед Хятад улс нүүрсний илүүдэл нийлүүлэлтийн асуудалтай тулгарсан бөгөөд үйлдвэрлэлийн эрэлт харьцангуй бага байгаа нь илүүдлийг бууруулахад хангалттай биш гэдгийг шинжээчид анхааруулж байна.
Хөгжлийн банк $500 саяын бондын өрөө барагдууллаа 💵
Ийнхүү 500 сая ам.долларын бондын өрөө өөрийн эх үүсвэрээр 100% төлж барагдуулснаар олон улсын байгууллагууд, хөрөнгө оруулагчдын өмнө хүлээсэн үүргээ амжилттай биелүүллээ. Энэхүү бондыг 2018 онд ОУВС-ийн хөтөлбөрийн хяналтын дор гаргаж байсан. Гадаад өр төлбөрөө барагдуулах нь олон улсын хөрөнгө оруулагчдын итгэлийг нэмэх, зээлжих зэрэглэлээ хэвээр хадгалах, ахиулах зэрэг давуу талтай билээ.
НДШ, ХХОАТ-ын шимтгэлийг 50% бууруулах уу? 🧾
НДШ, ХХОАТ-ын шимтгэлийг 50 хувь бууруулах нийтийн өргөдлийг дэмжсэн хүний тоо 100,000-д хүрснээр чуулганаар хэлэлцэхээр болж байна. Үүний өмнө нийтийн өргөдлөөр НӨАТ-ын буцаан олголтыг 5% болгох асуудлыг 104 мянган иргэн дэмжиж, УИХ-ын чуулганаар танилцуулан, Төсвийн байнгын хороо хэлэлцэж уг асуудлаар ажлын хэсэг байгуулаад байгаа билээ.
Түгжрэлийг бууруулах хуулийн төслийг хэлэлцэнэ 🚗
УИХ-ын Төрийн байгуулалтын байнгын хороо хуралдаж Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийг чуулганаар хэлэлцэх нь зүйтэй гэж үзлээ. Хуулийн төсөлд замын хөдөлгөөний төлбөртэй бүс, түүний хилийн зааг, цагийн хязгаарыг тогтоож, төлбөртэй бүсэд тогтоох төлбөрийн хэмжээг Нийслэлийн ИТХ тогтоохоор тусгаад байгаа юм.
500 автомашины зогсоол энэ сард ашиглалтад орно 🚘
Чингэлтэй дүүргийн 32-ын тойргийн урд талд 500 орчим автомашины зогсоолын барилгын ажил хийгдэж байгаа бөгөөд энэ сарын 10-нд ашиглалтад орох юм байна. Мөн Зүүн дөрвөн замаас зүүн тийш хувийн ААН, байгууллагуудаас авто зогсоолын газар авах, ашиглахаар төлөвлөж байгаа талаар Нийслэлийн удирдлага мэдээллээ.
2023 онд 600 мянга гаруй жуулчин Монголд зочилжээ 🧳
Эдгээр жуулчид манай улсад нийт 3.4 их наяд төгрөгийн орлого оруулсан байна. Түүнчлэн БОАЖЯ өвлийн аялал жуулчлалыг дэмжихэд ₮55 тэрбумын хөнгөлөлттэй зээл олгохоор болжээ. Мөн 2024 онд ₮3.1 тэрбумын татаас олгох төсвийг ирэх 7 хоногийн ЗГ-ын хуралдаанд оруулах гэж байна.
 4 дэх тэрбумтан тамирчин АНУ-ын мэргэжлийн сагсан бөмбөгийн од асан Мэйжик Жонсоны хөрөнгө $1.2 тэрбум хүрснийг Forbes сэтгүүл мэдээллээ. Түүнээс өмнө тэрбумтан болсон тамирчид нь Майкл Жордан, Леброн Жэймс нарын сагсан бөмбөгчид болон гольфчин Тайгер Вүүдс нар юм. |  Л.Мессигийн 8 дахь Ballon D’or Дэлхийн аварга, Аргентины шигшээ багийн ахлаг Л.Месси өмнө нь 2009, 2010, 2011, 2012, 2015, 2019, 2021 онд "Ballon d'Or" шагналыг хүртэж байсан бөгөөд өдгөө 36 настай тэрбээр энэ шагналыг хамгийн олон удаа хүртсэн хөлбөмбөгчин боллоо. |
 X-ийн үнэлгээ 55% унав Илон Маск Твиттерийг (одоо X гэж нэрлэдэг болсон) авснаас хойш компанийн зах зээлийн үнэлгээ 55 хувиар унаж $19 тэрбум болсон байна. Энэ нь долоо хоног бүр $480 саяар, өдөр бүр $68 саяар үнэ цэнээ алдсан гэсэн үг юм. |  15 минутад 299 үг цээжлэв Ой тогтоолтын Азийн холбооноос зохион байгуулсан Ази тивийн аварга шалгаруулах нээлттэй тэмцээний Баганан үгс төрөлд ОУ-ын мастер Ц.Номин-Эрдэнэ 15 минутад 299 үг алдалгүй санаснаар өсвөрийн дэлхийн рекордыг шинэчлэв. |
Apple компани шинэ загварын Macbook pro, iMac болон M3 чипүүдээ танилцууллаа. Шинэ бүтээгдэхүүний танилцуулга видеог хүлээн авна уу.
