- Makers News
- Posts
- Makers News #38
Powered by
2023 оны 43 дахь Баасан гарагийн мэнд! 😁 Энэ жилийн 80 гаруй хувь өнгөрлөө. Тиймээс үлдсэн хугацаанд хичээж, энэ онд тавьсан зорилгодоо хүрцгээе.
🔎 Ажлын байрны нээлттэй өдөрлөг зохион байгууллаа
Нарийнсухайтын уурхайн Захиргаа, хүний нөөцийн хэсэг Улаанбаатар хотын алслагдсан 3 дүүрэг болох Налайх, Багануур, Багахангай дүүрэгт 10-р сарын 25-30-ны өдрүүдэд “Ажлын байрны нээлттэй өдөрлөг” зохион байгуулж байна. Багануур дүүрэгт 10-р сарын 25-нд өдөрлөг зохион байгуулж, 37 ажил горилогчийн анкет хүлээн авч, ярилцлага хийжээ.
🌳 Мод ургуулах ойлголт түгээх өдөрлөг боллоо
БОТХГ-аас намрын бүх нийтээр мод тарих өдрийг тохиолдуулан 10-р сарын 25-26-ны өдрүүдэд East&West борлуулалтын төвүүд болон Төв оффист модыг хэрхэн зөв тарих, арчлах талаар мэдлэг олгох өдөрлөг зохион байгуулж, нийт 100 орчим ажилтан хамрууллаа. Сургалтын үеэр мод тарих нүх ухахаас эхлээд хөрс бэлдэх, бордох хүртэлх бүхий л үе шатны талаар мэргэжлийн зөвлөгөө өгсөн юм.
👀 Манай үйлдвэрүүд сэтгүүлчдийн нүдээр
Өнгөрсөн долоо хоногт Эдийн засгийн сэтгүүлчид болон бусад хэвлэл мэдээллийн хэрэгслийн сэтгүүлчдийг барилгын материалын үйлдвэрүүдтэй танилцуулсан билээ. Танилцах аялалд оролцсон сэтгүүлчдийн бэлтгэсэн мэдээлэлтэй доорх холбоосуудаар танилцаарай.
🧠 АХА тэмцээний ялагчид тодорлоо
Бид байгууллагынхаа 30 жилийн ойг тохиолдуулан хамт олноороо телевизийн хөгжөөнт, цэнгээнт АХА нэвтрүүлэгт орж, дурсамж бүтээлээ. Тэмцээнд үйлдвэр, уурхай, компаниа төлөөлөн нийт 46 ажилтан оролцож, дараах ажилтнууд шагналт байрт шалгарсан юм.
🥇 I байр: Ш.Шарав, ГХГ-ын Ахлах гидрогеологич
🥈 II байр: Я.Отгонбаатар, TTRC ХХК-ийн Менежер
🥉 III байр: Б.Анхбаяр, НСУ-н Хүний нөөцийн мэргэжилтэн
Хамт олныхоо оролцсон нэвтрүүлгийг маргааш буюу Бямба гарагийн 18:00 цагаас TV9 телевизээр хүлээн авч үзээрэй.
🗺️ Шинэ ажилтнуудын танилцах аялал болж байна
ЗУГ-аас уламжлал болгон зохион байгуулдаг шинэ ажилтнуудын барилгын материалын үйлдвэрүүдтэй танилцах аялал өнөөдөр болж байна. Энэ удаагийн аялалд Төв оффист ажилд орсон 45 шинэ ажилтан оролцох ба МЕВАХҮ - МАК Евро Блок - МАК Евро Цемент гэсэн маршрутаар 630 км зам туулан барилгын материалын 4 үйлдвэртэй танилцах юм.
МАК үйлдвэр, уурхайн бүсдээ нийт 15 төрөл зүйлийн мод тарьж ургуулж байна 🌳
Байгалийн хий дамжуулах хоолойн бүтээн байгуулалт 🔋
ОХУ-аас БНХАУ руу Монголын газар нутгаар дамжуулан байгалийн хий гаргах шугамын бүтээн байгуулалт 2024 оны I улиралд эхлэх төлөвтэй байгааг ОХУ-ын Шадар сайд мэдэгдлээ. Одоогоор төслийн урьдчилсан ТЭЗҮ бэлэн болоод байгаа аж.
Дараах хүмүүст томуугийн вакциныг үнэгүй хийж байна 💉
Томуугийн эсрэг вакциныг тархвар судлалын заалтаар 2-5 хүртэлх насны хүүхдүүд, жирэмсэн эмэгтэйчүүд, уушгины архаг өвчтэй, архаг хууч өвчтэй хүмүүс, 65-аас дээш насныханд өрхийн эмнэлэг болон сум, дүүрэг, аймгийн эрүүл мэндийн төвүүдэд үнэгүй хийж байгаа юм байна.
RFID ба төлбөртэй бүс 🚗
Тээврийн хэрэгслийн техник хяналтын цахим гэрчилгээг /RFID/ 11-р сарын 1-ээс орон даяар тараахаар болжээ. Үүнээс гадна, хотын дарга Х.Нямбаатар Засгийн газар, УИХ-д өргөн барих гэж буй “Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай” хуулийн төсөлд “Төлбөртэй бүс” тогтоох тухай санал оруулжээ. Тодруулбал, хотын даргын тогтоосон бүсэд өдөрт нэг удаа нэвтрэхэд төлбөргүй ба 2 дахь удаагаас эхлэн 0-27,500 хүртэлх төгрөгийн төлбөр төлөх зохицуулалт багтжээ.
Усны үнэ нэмэгдэнэ 🚰
Тодруулбал, 11 сарын 01-нээс орон сууцны айлуудын хэрэглээний цэвэр усны төлбөр одоо байгаагаасаа 27 мөнгөөр нэмэгдэж нэг литр нь 1.34 төгрөг болох гэж байна. Харин аж ахуйн нэгжүүд цэвэр усны литр тутамд 2.69 төгрөг төлөх аж.
АНУ-ын 5 хот руу нислэг үйлддэг боллоо 🛫
МИАТ Хонгконгоор дамжин АНУ-ын Чикаго, Бостон, Нью-Йорк, Сан-Франциско, Лос-Анжелес хотууд руу нислэг үйлдэхэд бэлэн болжээ. Нислэгийн тасалбарыг 10-р сарын 20-оос борлуулж эхэлжээ.
Шар хадны чиглэлд зам засварын ажил хийнэ 🚧
Энэ сарын 27-29-ний өдрүүдэд Гачууртын авто замаас Шар хадны автобусны эцсийн зогсоол хүртэлх авто замыг хааж өргөтгөл, шинэчлэлийн ажил хийх юм байна.
 Сарны насыг шинэчлэн тогтоов Эрдэмтэд 1972 онд хийсэн “Apollo 17” ажиллагааны үеэр авч ирсэн хөрс, чулуулгийн дээжийг судлан сарны насжилтыг 4.5 тэрбум хэмээн шинэчлэн тогтоолоо. Энэ нь нарны аймаг бүрэлдсэнээс 110 сая жилийн дотор үүссэн гэсэн үг юм. |  2000 жилийн настай сийлбэр Амазон мөрний усны түвшин сүүлийн 100 жил дэх хамгийн доод түвшинд хүрч 1000-2000 жилийн настай сийлбэрүүд ил гарч эхэлжээ. Ингэснээр сийлбэрийн гарал үүсэл, хэдэн жилийн өмнө сийлсэн зэргийг тодорхойлох боломжтой болсон аж. |
 Муммигийн царайг сэргээжээ Перу улсаас 1995 онд олдсон ховор олдвор болох “Juanita” буюу “мөсөн охин” нэртэй муммигийн царай төрхийг сэргээснээ эрдэмтэд үзүүлжээ. Уг олдворыг одоогоос 500 гаруй жилийн өмнө бурханд тахил өргөх шашны зан үйлийн золиос болсон Инка охины мумми гэж үздэг байна. |  Meta-г шүүхэд дуудав АНУ-ын 10 муж Инстаграм болон Фэйсбүүкийг эзэмшдэг Meta компанийг залуучуудын сэтгэцийн эрүүл мэндэд хохирол учруулсан гэж шүүхэд өгсөн байна. Тус заргад сошиал медиа ашиглах эрсдэлийн талаар олон нийтийг төөрөгдүүлсэн гэж тус компанийг буруутгажээ. |
Хүүхдэд зориулсан шинжлэх ухааны үндэсний контент ус агаар шиг дутагдаж буй энэ үед “Ybot“ гэх үзүүштэй, хүүхдэд тохирсон зураглал бүхий шинэ контент мэндэлжээ.
